Sawhthing aṭangin Cheng nuai 600 vel lak luh inbeisei

Khanpui Sawhthing Chingtu Pawl (KSCP) chuan thuchhuah siamin, kuminah an khuain sawhthing aṭangin cheng nuai 600 vel la lut tura an inngaih thu an tarlang a, Pathian malsawmna an dawn avangin an lawm tak zet thu an sawi.

Khanpui khua hi Aizawl aṭanga hmar lam km. 90 vela hlá, Chalfilh tláng panga awm a ni. Chhungkua 355 vel awm­in, an eizawnna pui ber chu kut hnathawh a ni a, sawhthing an ching uar hle a ni.

KSCP chuan, sawh­thing hralhna a ṭhat beiseiin mirethei tê tête'n kum 2015 aṭangin an phâk tawkin sawhthing an chíng uar tih an sawi a, "Kum tinin kan ching tam chho hret hret a. A tám hrite'n min tihbuai ve avangin kan beisei angin kan thar hlâwk thei lo. Chuti chung chuan, a kum ngana, kum 2019 a lo thlen hian Pathian­ malsawmna changin, sawh­thing kan thar chhuah belhkhawm chu quintal 14,500 vel a lo ni ta a ni," an ti.

Sawhthing chingtu pawlin an chhût danin, Khanpui khuaa chhung­kua 275-in sawhthing an chin aṭangin kuminah qtl. 14,500 vel an thar. Sawhthing chu kuminah kg. khatah Rs. 25 - 60 inkarin an hralh ber a, kum­inah sawhthing aṭang­in khaw mipuite'n cheng nuai 600 (Rs. 6,00,00,000) vel an la lut tura ngaih a ni.