BJP-in Judicial Inquiry Committee din phût

BJP Mizoram Pradesh hruaitute chuan nimin khan an pisaah thuthar thehdarhtute an kâwm a; Durtlang Leitana BSUP Housing Complex-a chhiat­na thleng chhui turin independent judicial inquiry committee din an phût thu an sawi.

BJP general secretary Vanlalhmuaka chuan BSUP Housing Complex-a chhiatna thlen dan chu rin thu insawi siak mai lo a, chhui chian an phût thu sawiin, "He chhiat­ tawhna chungchang chhui chiang tur hian state sorkar hi a rang thei ang bera independent judicial inquiry committee dina chhui nghal turin kan phût. Chhiatnaa mawhphurtu chu tu pawh ni rawh se, dik tak leh fel taka chhui chhuah a, hrem ngei hi kan duh a ni," a ti.

Chief Minister-in, 'Inquiry committee kan din ang' a ti chu lawmawm an tih thu a sawi rual­in Vanlalhmuaka chuan, "Sorkar hmai phih faina mai leh mipui thinrim tur tihdaihna mai ni loin, independent judicial inquiry committee dik leh mipui rin ngam din ngei se tih chu kan duh dan a ni," a ti a; chhiat tawhna chu sorkar ṭawngkam thiama sawi mâm chi a nih loh thu a sawi.

BJP General Secretary chuan, hetiang chhiat tawhna a awm tawh lohna turin sorkarin awm­ze neiin, tih tak zetin hma la se an duh thu sawiin, "State sorkarin nunna hlu tak chán tate zangnadawmna atana Rs. 4,00,000 ṭheuh pek a lo tiam leh, state-in zangdawmna atana limit a lo neih hi beitham kan ti hle," a ti.

Vanlalhmuaka sawi danin, Mizoram BJP hruaitute chuan nimin zing khan BSUP Housing Complex tlawhin, nunna chán mi pathumte râlna atan Rs. 2,000 ṭheuh, hliam tuar mi pakuate kanna atan Rs. 1,000 ṭheuh leh, Durtlang Leitan YMA hnenah Rs. 3,000 an hlan a ni.