Zoram Medical College hlawhtlintir ngei kan tum ruh hle - Health Minister

MNF sorkarin ZMC/MIMER hlawhtlintir an tum hle tih sawiin Health Minister chuan, "Medical Council of India duh dan ang zûlzui ni bawkin nimina Chief Minister hoa ṭhukhawm chuan ZMC atana hna lak belh a thuphungin kan pawm a ni," a ti a; ZMC hmasawnna atan theihtawp an chhuah thu a sawi.

Dr R Lalthangliana chuan, society anga ZMC/MIMER kalpui tur chuan thil tih tur tam tak a awm thu sawiin, "Tun hnai maiah chuan society anga engkim kalpui theih a nih ka ring lo. State sorkar nghêng lo chuan tun dinhmunah chuan kaltir chi a la ni lo," a ti.

Health Minister duh dan angin, ZMC hi society anga kalpui law law nge, department hnuaia awm tir law law ṭha zawk ang tih zir chiang tur committee din a ni a; committee chuan an report an thehlut tawh a, mahse, duhkhawp a nih loh avangin report siamṭha leh tura tih an ni.

Mizorama medical college hmasa ber hi Mizoram Institute of Medical Education and Research (MIMER) tih hming vuah a ni ṭhin a, MCI-in a hmuna an endik hnuah recognition an hmuh tawh tihnun nawnna hmasa ber (first renewal) chu MCI-in a phalsak tawh a, a kum hnihna atan kalpui zel a phalsak.

Tarlan tawh ṭhin angin, Mizoram sorkara Council of Ministers meeting chuan MIMER hming hi ZMC tia thlak a lo rél tawh a, chu Cabinet thutlukna ang chuan Health & Family Welfare Secretary pawhin April 26, 2019-ah notification tichhuakin, MIMER hming chu ZMC tia thlak a nih thu a tarlang.

Hetih lai hian, Medical Council of India chuan medical college hi Mizoram Institute of Medical Education and Research tiin a la chhinchhiah (register) reng thung. MIMER-ah hian first year-ah chuan subject pathum - Anatomy, Physiology leh Biochemistry-te a awm a; second year-ah subject panga - Pathology, Microbiology, Pharmacology, Forensic Medicine & Toxicology leh Community Medicine-te a awm dawn a ni.