Kum khat hnuah Horticulture College hawn beisei
Mizoram Horticulture Service Association leh Mizoram Agriculture Service Association hruaitute chuan nimin khan Thenzawla College of Horticulture hmunhma buatsaih mek an tlawh a, in sak mek leh an invawm luh mek dante an enfiah. College hi tun aṭanga kum khat velah hawn theih beisei a ni.
College of Horticulture hi a hmun nghet tura building-te sak mek ni mah se, College of Veterinary Science & Animal Husbandry, Selesihah July 2016 aṭangin class an ṭan tawh a; batch hmasa berah seat 20 awmah zirlai 17 an awm a, batch hmasa berte chuan kuminah an zo ang.
Building sak a nih mek laiin, college ram chhungah tho Prefab Construction hmangin classroom, hostel leh ṭul dangte siam a ni a, Selesih aṭangin an insuan tawh. Batch hnihnaah zirlai 17 leh batch thumnaah zirlai 14 an lut a ni.
Horticulture College-ah hian College of Veterinary Science & Animal Husbandry-a professor Dr H Prasad chu dean-in a awm a, faculty pakua an awm mek.
Dr H Prasad chuan, harsatna lian tham tak an neih loh rualin, kum khat liam ta vela tui connection tihna tura PHE department hnena cheng nuai 45 an pek tawh chu zawh a la nih loh thu leh, power lakna tur pawh P&E department-ah cheng nuai 54 an hlan tawh thu a sawi.
College of Horticulture hmun tlawhnaah hian Horticuture director Dr Elizabeth Saipari chuan, thawktu lak zel turah an thiamnain a tlin chuan ram leilung fate a tam thei ang ber la turin a chah a; Thenzawl Vengthar V/C leh YMA-te pawh neitu nihna thinlung pu tur leh in satu hnam dangte harsatna sutkiansak zel turin a ngen bawk.
College campus hi square ft. 20,000-a zau a ni a, administrative building, classroom leh laboratory room te, mipa hostel leh hmeichhe hostel-te sak mek a ni. A satu contractor chu NPCC a ni a, cheng vaibelchhe 71 senna tura ruahman a ni.
A satute chuan press mite zawhna chhangin, ruahtui tlak tam avangin hmanrua lak khawm kawng lamah harsatna an tâwk ṭhin a, hun bituk chhunga an zawh hman loh deuh an rin thu leh, a ṭul anga hun pawhsei dil belh an tum thu an sawi.