Durtlang Leitan BSUP Complex-a chêngte BSUP Housing Complex dangah sawn an ni

July 2, 2019 zana Durtlang Leitana Basic Services to Urban Poor (BSUP) Housing Complex-a in 20 zinga pathum lei leh lung tawlhin a tihchim hnuah, in dang zawng zawnga chengte pawh sorkar (UDPA department) ruahmanna angin Edenthar Veng leh Rangvamuala BSUP Complex-ah sawn luh mek an ni. Hetih lai hian, Durtlanga awm zinga a tam zawk chuan an awmna ngaia awm zui an duh.

UDPA department tarlan danin, July 2 zana lei leh lung tawlhin in a tihchhiat pathum awmna tlarah in panga a awm a, in panga chu chhungkaw 80 awm theihna a nih laiin, chhungkua 36 an chêng mek anga ngaih a ni a; mahse, chhiatna thlen lai khan chhungkua 24 an chênga hriat a ni.

Chhiatna a thlen hnuah sorkar hotute thu angin BSUP Housing, Durtlang Leitana awm zawng zawngte chu chhuahtir vek an ni a, an awm lailâwkna atan Leitan YMA-in community hall a ruahman bakah, Durtlang MC Hall-ahte pawh an awm a; an chhungkhatte bêl rih an awm nual bawk.

Durtlang Leitan BSUP Housing Complex-ah awm chhunzawm a rem rih loh avangin UDPA department chuan chhungkuate chu Edenthar Veng leh Rangvamuala BSUP Complex-ah awm turin ruahmanna a siam a; July 4 aṭang khan chhungkuate chu an awm duhna zawk thlantir an nih bakah, an awmna tur in (house no.) pawhtir an ni.

Chhungkua sawn chhuah tur zawng zawng zat chu chhungkaw 118 an ni a, chu'ng mite tan chuan Rangvamual leh Edenthar Venga BSUP Complex-ah allocation siam fel tawh a ni a; nimin lam thleng khan chhungkua 81-in an awmna tur an pawt tawh.

Hetih lai hian, Durtlang Leitan BSUP Housing Complex-a awm zinga chhungkua 64 chuan an awmna ngaiah awm zui an duh thu sorkar hotute hnenah ziakin an thlen. UDPA department hotute chuan, BSUP Complex-a chengte chhuak rih tura an tih chhan chu an awmna inte a him leh him loh sorkarin enfiah phawt a tum vang a nih thu an sawi a; an chenna ngaia an awm lêt theih leh theih lohah Disaster Management & Rehabilitation department ngaihdan an ngaihchan thu leh, chu chu a mi chengte an hriahfiah tawh thu Vanglaini palai an hrilh.

Edenthar Veng leh Rangvamuala BSUP Housing Complex-a awm turte chu July 4 aṭang khan an insawn ṭan a, UDPA department-in buaipuiin, an insawnna tur lirtheite pawh a ngaihtuahsak. BSUP Housing Complex, Durtlang Leitan hi July 1, 2018 hawn a ni a, a hawnnaah hian chhungkaw chenna - dwelling unit (DU) 320 zinga 232 luahtu turte hnenah allotment order pek a ni.

UDPA department chuan June 2019 khan chhungkaw cheng zat dik tak hriat tumin an enfiah a, chutah chuan chhungkua 118 chiah a tak takin an khawsa tih an hmu chhuak. Chhungkaw 35 dangte chuan chenna nan tak tak hmang loin, an bungraw ṭhenkhat dah nan an hmang a; allotment hmu tawh chhungkaw 79 dangin an luah lo hrim hrim bawk.

Housing Complex atan hian sorkar laipuiin February 28, 2009-ah project pawmin, a sakna tur sum first instalment cheng nuai 589 chu July 14, 2009-ah pek chhuah a ni. Implementing agency NPCC-in a satu atana contractor an thlan Royal Infra Constructions Ltd., Kolkata-in August 28, 2009-ah an khawih ṭan a, May 31, 2018-ah sak zawh niin, a sakna atana sum hman zawng zawng chu cheng nuai 2,624 (central-in nuai 2,357 leh state-in nuai 267 an tum) a ni.