District thar pathum atan post 48 ṭheuh siam a ni

Mizoram sorkar chuan district thar pathum - Hnahthial, Khawzawl leh Saituala deputy commissioner pisa din thara thawk turin post 48 ṭheuh a siam thar a; an district code turte pawh tihfel a ni tawh.

General Adminis-tration department (GAD)-in July 4, 2019-a hriattirna a tihchhuah dan chuan, Saitual, Khawzawl leh Hnahthial district-a DC office-a thawk tur post 48 ṭheuh siam a nih bakah, khaw pathuma Sub Divisional Officer (Civil)-te chu SDO (Sadar) tia thlak a ni a; MCS senior grade (pay matrix-a level 11)-te luah tura dah a ni.

Hnahthial district bik atan chuan, DC office atana post 48 siam zinga 11 chu SDO (Civil) office-a awmte rin nghal tur a ni a, post thar hlak 37 siam tura tih a ni. Khawzawl DC office-ah chuan post thar hlak 46 siam a ni a, post pahnih chu SDO(C) office-a mi chhawm tur a ni.

Saitual DC office atan post thar hlak 15 siam niin, post 33 chu thawktu awm sa rin tur a ni thung. Post an siam dan chu DC office tinah - deputy commissioner pakhat, additional DC pakhat, election officer pakhat, sub-Deputy Commissioner pahnih, superintendent pakhat, assistant pathum, steno-grapher-II pakhat, UDC panga, LDC pasarih, driver panga, despatch rider pakhat leh group 'D' 20 ṭheuh a ni.

GAD-in hriattirna a tihchhuah hi DPAR (ARW)-in June 20, 2019-a a pawm hnu leh Finance department-in June 27, 2019-a a pawm hnua tihchhuah a ni. Notification-a a lan danin, Saitual district code tur chu 09 a ni dawn a, Khawzawl chu 10 leh Hnahthial chu 11 a ni ang.