KHAWTHLIR

Vawiin, July 6 hi Mizo Hmeichhe Insuihkhawm Pawl (MHIP) din champha vawi 45-na a ni a, Mizoram hmun hrang hrangah MHIP branch-te'n an lawm dawn. MHIP Day vawi 46-na hi MHIP hruaitute'n hmun hrang hrangah an hmanpui dawn a; intihhlimna hun leh infuih tharna hunte an hmang dawn a ni. MHIP hi July 6, 1974-ah din a ni.

Aizawl DC chuan thupek chhuahin, dan kalhin Aizawl hmun hrang hrangah petrol leh diesel zawrh a nih thu a tarlang a, "Kângmei tichhuak thei a nih avangin heng zawrhna bul hnaia chêng leh kawnga kal mipui tan a him loh avangin mipui him zawkna ngaihtuah a ṭul a ni," a ti a; Aizawl khaw chhungah danin a pek phalna nei loa petrol leh diesel zawrh a khap. Thupek bawhchhia chu IPC Section 188 hmanga hrem an nih tur thu a tarlang.

Mizoram sorkara secretary-te meeting-in a rel angin, nimin khan New Capital Complex-ah SAD leh Disaster Management & Rehabilitation department ten Fire Mock Drill an buatsaih. Mock drill hi Fire & Emergency Services leh Aizawl DC office-a disaster management lam mite'n an pui.

Agriculture minister C Lalrinsanga chuan nimin khan Serchhip thlang, Mat lui kama buh leh thlai dangte chinna hmunpui Záwlpui zau leh a chhehvel ramte a tlawh a, lo neitute nen an inkâwm. Minister chuan, "Kan ram tana ka rualawh em emna chu - kan thar chhuah ve theih reng state pawn thlai chi hrang hrangin kan tap-chhak leh kan chawhmeh báwm a luah tam lutuk tihreh hi a ni," a ti.

Mizoram University chuan nimin khan an campus-ah Sports Promotion Programme an buatsaih a, Indian hockey player Lalremsiami Hmar chu MZU Sports Ambassador ni turin chawimawina an hlan. MZU vice chancellor Prof. KRS Sambasiva Rao chuan, Lalremsiami Hmar thil tawnte a hriatin, harsatna kara a tumruhna chu ṭhalai zawng zawng entawn tlak a nih thu a sawi.