SHC inthlan buatsaih thuai an phût

Save Sinlung Hills Coun­cil Committee (SSHCC) hruaitute chuan nimin khan Aizawl Press Club-ah thuthar thehdarhtute an kâwm a; Sinlung Hills Council (SHC) inthlan buatsaih thuai an phût thu an sawi. SHC interim term kal mek chu thla ruk pawhsei a nih hnuah tun hnai khan thla li dang atan pawhsei leh a ni.

SSHCC convener Lal­rem­ruata Varte chuan, HPC(D) leh Mizoram sorkar inremna zûlzuiin SHC a pian thu sawiin, "He council hi hun lailâwka lo enkawl turin Mizoram sorkar leh HPC(D) chuan interim sorkar siamin member an ruat a. Amaherawhchu, interim sorkar hi January 8, 2019 khan an term a tawp tak avangin sorkar chuan interim period chu thla ruk atan a pawtsei leh a ni," a ti.

Interim term pawhseiah hian Mizoram sorkar chuan inremna a ziahpui HPC(D) lam ráwn loin SHC member tur chu an duhsak zawngte dah luhna atan a hmang nia sawiin Lalremruata chuan, "HPC(D) returnee phei chu pakhat chiah a awm. Hemi chungchangah hian HPC(D) lam pawh an lungawi lo hle," a ti a; buaina a awm leh palh duh loin HPC(D)-te chuan inremna thuthlung zah avangin ngawih an chuh thu a sawi.

SSHCC Convener chuan, SHC interim period July 8, 2019-a tàwp tur chu nimin (July 5) khan thla li atan pawhsei leh a nih thu a sawi a, "An pawtsei a nih pawhin, inthlan atana inbuatsaih chhung thla hnihte chu pawtsei se kan hrethiam. A rang thei ang bera inthlan buatsaih vat turin sorkar kan phût a ni," a ti.

•    SHC interim period hi party induhsakna atana hmang tawh lo turin kan duh. SHC hi Sinlung Hills Development Council a nih aṭanga chhûtin kum 25 interim period a hmang tawh a, interim period hi mipuiin an ning tawh a, pawhsei ni tawh lo se ṭha kan ti. Hemi chungchangah hian Ex-Hmar  Volunteer Association (HPC)-te pawhin thuchuah an siam tawh a ni.

•    SHC interim period hi tihtawp a, SHC election a rang thei ang bera buatsaih turin sorkar kan ngen a, tunah hian election rules leh boundary engkim peih vek tawh a nih avangin mipuite'n an aiawh an thlan theihna turin election hi a rang thei ang bera neih ni rawh se.

•    SHC hi election neih a nih hma chuan SHC budget-a development works khawihna tur budget (minor works head) hi cheng khatmah khawih chêt ni lo se kan duh a, hei hi ngun takin kan thlithlai reng dawn.

•    Mizoram sorkar leh HPC(D) inremna zûlzuia SHC tihchangtlunna turin Mizoram sorkar chuan post hrang hrang 34 siam a remti hi a lawmawm  hle. Heng post hrang hrangte zinga mi, state service post ni lo zawng, non-gazetted post hrang hrangahte hian HPC returnee leh an tu leh fate a theihna apianga thun turin Mizoram sorkar kan ngen a ni.