MNF sorkarin dâwt bànsan rawh se - ZPM
ZPM chuan thuchhuah siamin, Boundary Commission dinna tura Prime Minister hnena memorandum thehluh tur chungchangah chief minister Zoramthanga chu thu dik lo sawiah an puh a, dâwt sawi bànsan turin an chah.
ZPM thuchhuah chuan, July 27, 2017-a MNF Gen.Hqrs. press release-ah ramri chungchangah chungchang an tarlang tih a sawi a; 'Kum 2006 khan Joint Parliamentary Committee din a ni a, kum 2007-ah Prime Minister hnenah Boundary Commission din tura ngenna memorundum siam a ni a, all party delegation in he memorundum hi thehlut tura tih a nih laiin, rokhawlhna a awm avangin kan chief minister Pu Zoramthanga khan a thehlut ta a ni,’ tiin an ziak tih a tarlang.
Boundary Commission memorandum chungchang chu Mizoram Legislative Assembly session-ah June 25, 2019 khan ZPM leader Lalduhoma'n Home minister Lalchamliana a zâwt tih tarlangin ZPM chuan, "Kum 2007-a Prime Minister hnena Boundary Commission dinna tura memorandum siam kha Prime Minister hnenah thehluh a ni ta em, tih zawhna chu, 'Boundary Commission dinna tura memorandum siam kha Prime Minister hnenah thehluh a nih hriat a ni lo,' tiin a chhang a. Thehluh loh chhan hi file-ah record a awm loh thu Home Minister hian a tarlang bawk," an ti.
ZPM chuan, MNF sorkar term hmasa kum 10 chhungin thu dik zîktluak lo mipui an hrilh fo nia sawiin, "Chief Minister hmathlir (vision) tam tak pawh tihhlawhtlin awm loin a thámral. Tun sorkarah pawh thutiam tam tak neiin bul an ṭan leh mek a ni," an ti a; MNF sorkar tharah dâwt sawi bànsan a, tihhlawhtlin ngei tur thu dik chauh sawi turin ZPM chuan MNF sorkar hotute thurâwn an pe a ni.