Serchhipah Heritage Day hmang

Serchhip Heritage Society (SEHSO) buatsaihin nimin khan Serchhip P&E Veng YMA Hall-ah Heritage Day hman a ni a, minister Lalruatkima leh bialtu MLA Lalduhoma ten an hmanpui.

Lalruatkima chuan, tunlaiah mahni hnam thil ngaihsan lohnain mi a chiah nasa hle tih sawiin, "Kan ṭawng a dal tial tial a, kan nau awihna hlate thlengin kan thlak danglam mek. Kan hnam ziate hlut thar leh turin ṭhangtharte'n mawhphurhna pawimawh tak kan nei a ni tih kan hriat ka duh. Lehkhabu ziah leh chhiarte uar ila, kan ṭawng a boral loh nan ziak mite ngaihlu thiam ila, an lehkhabu ziahte pawh i chhiar tam ang u," a ti.

Minister Lalruatkima hian K Rem­ruatfela lehkhabu ziah, Serchhip chanchin inziahna Serchhip (A brief history) tih a tlangzarh nghal a ni.Lalduhoma pawhin thu sawiin, "Kawlri tlang leh En tlang chu heritage centre lian tak atana buatsaih tum a ni a, cheng vaibelchhe 15 man vel project buaipui mek a ni. Mizoram University-a mithiam 11-te'n project tur hi an buaipui a ni," a ti.

SEHSO president Lalrinṭhuama Kawlni chuan, SEHSO dinchhuah a nih dan a sawi a; Serchhipa pi leh pute hmun hlui pawimawh awmte a rîral mai loh nan ṭhangtharte hmuh theih tura vawn him zel an tum thu a sawi.