CM-in ramri chinfel dan a hriat mipui hriata puanzar a rem rih lo

Home minister Lalchamliana chuan Congress Legislature Party (CLP) leader Zodintluanga zawhna chhangin, chief minister Zoramthanga'n 'Ramri chinfel dan tur (strategy) felfai tak ka nei' a tih chu mipui hriatah puanzar a la rem rih loh thu House a hrilh a, "A hma latu turte erawh chu a ṭul anga hriattir zel an ni," a ti.

Home Minister tarlan danin, CM-in ramri chinfel dan a hriat a puanzar theih loh chhan chu a rem rih loh vang a ni. Assam leh Mizoram ramri chingfel tura hmalakna atan Mizoram sorkar chuan Union Home Secretary hnenah December 15, 2019 khan Mizoram leh Assam ramri chu Bengal Eastern Frontier Regulation 1 of 1873, notification no. 2299 P dated August 20, 1875 leh Inner Line of the Lushai Hills notification no. 9102 AP dated March 9, 1993 behchhana en ṭha leh tura rawtna a thawn a ni.

MNF member Lalrintluanga Sailo-in Bairabi Zophai, Assam leh Mizoram ramria MZP-te'n chawlhbûk sak an lo tumnaah sorkarin hmalak tumna emaw, hmalakna a neih tawh leh tawh loh a zawhna chhangin Lalchamliana chuan, "Bairabi Zophai, Assam nena Mizoram ramriah hian Mizoram sorkarin hma a la mek zel a ni," a ti.