Covid-19 hripui léng leh inkhàrkhipin Aizawla kohhran thawhlawm a nghawng

Vanglaini palaiin a biak kual­naah Aizawl khawpui chhunga tualchhung kohhran 12 biak an ni a; Presbyterian kohhran 10 leh Baptist kohhran pahnih an ni. Kohhran 12 zinga 10 chuan nikumah khan kum hmasa (2019) chhunga thawhlawm an hmuh an pha lo a, kohhran pahnih erawh chuan an khûm thung. 

Kum 2020 (calendar year - January-December) chhunga sum lut zat tarlan hi ṭhenkhat chu la audit loh a ni a, audit tawh eng emaw zat a awm. 

Mizorama tualchhung koh­hran lian ber Mission Veng Kohhran chuan nikum khan kum 2019-a thawhlawm lut zat cheng nuai 124 chuangin an pha lo. Kum 2019 khan Rs. 9,96,19,308 an hmuh laiin, kum 2020-ah chuan Rs. 8,71,61,684 an hmu a; kum hmasa an phâk lohna chu Rs. 1,24,57,624 a tling. 

Bethlehem Veng Presbyterian Kohhran chuan kum 2019 khan Pathian ram ip hrang hrang aṭangin Rs. 3,19,82,673 an hmuh laiin, kum 2020-ah Rs. 3,04,75,970 an hmu a, kum hmasa an phâk lohna chu Rs. 15,06,703 a ni. 

Bawngkawn Presbyterian Kohhran pawhin hripui léng vangin kum hmasa an phâk lo. Kum 2019-ah khan thawhlawm an hmuh zat chu Rs. 5,17,02,405 a ni a, kum 2020-ah erawh chuan Rs. 4,69,33,271 a ni. Kum 2019-a an hmuh zat an phâk lohna chu Rs. 47,69,134 a tling. 

Chhinga Vengthlang Presby­terian Kohhran chuan kum 2019-ah Rs 1,70,46,049 an hmuh laiin, kum liam ta 2020-ah khan Rs. 1,67,68,055 an hmu a, kum 2019-a an hmuh chu Rs. 2,77,994-in a tam zawk. 

Dawrpui Kohhranin kum 2019-ah Pathian Ram ipa Synod-a lut leh Tualchhunga lut Rs. 5,61,85,628 a nih laiin, kum 2020-ah chuan Rs. 5,39,26,685 a ni a, kum 2020-a a hmuhin kum 2019-a hmuh zat Rs. 22,58,943-in a pha lo. 

Electric Vengthlang Presby­terian Kohhran pawhin kum hmasa an pha lo. Kum 2019-ah Rs. 1,11,28,470 an hmuh laiin, kum 2020-ah Rs. 1,06,64,175 an hmu a; kum hmasa an phâk lohna chu Rs. 4,64,295 a ni. Vaivakawn Kohhran chuan kum 2019 khan Synod leh Tualchhungah Rs. 2,86,11,136 an hmuh laiin, kum 2020-ah Rs. 2,71,94,519 an hmu a, kum hmasa an phâk lohna chu Rs. 14,16,626 a ni. 

Zarkawt Presbyterian Kohhran chuan thawhlawm chi sarih aṭangin kum 2019 khan Rs. 5,57,32,684 an hmuh laiin, kum 2020-ah chuan Rs. 5,54,99,025 an hmu a, kum hmasa an phâk lohna chu Rs. 2,33,659 a ni. Zarkawt kohhran hruaitute chuan, a pumpuia lâk chuan kum 2019-a thawhlawm a sáng zawk a, mahse, tualchhung sum tih loh thawhlawm chi rukah chuan 2020-a an thawh zat a tam zawk vek tih an sawi.

BCM Shalom Kohhran, Mission Vengthlang pawhin kum hmasaa an hmuh an pha lo. Kum 2019-ah Rs. 221,82,547 an hmuh laiin, kum 2020-ah chuan Rs. 191,28,380 an hmu a, kum hmasa an phâk lohna chu Rs. 30,54,167 a tling.

BCM Chanmari, Aizawl chuan kum 2019-ah Rs. 99,96,160 an hmuh laiin, kum 2020-ah chuan Rs. 97,08,065 an hmu a, kum hmasa an phâk lohna chu Rs. 2,88,095 a ni. Thawhlawm ip lut zat pawh 75-in a tlahniam bawk.

Vanglaini palaiin tualchhung kohhran hruaitute a biak 12 zingah kohhran 10-te chu Covid-19 léng leh inkhàrkhip avangin an thawhlawm a tlakhniam laiin, kohhran pahnih erawh chu a pung thung.

Khatla Presbyterian Kohhran chuan kum 2019-ah Rs. 6,26,54,038 an hmuh laiin, kum 2020-ah chuan Rs. 6,27,38,949 an hmu a, hripui lên kuma an thawhlawm hi kum hmasa aiin Rs. 84,911-in a tam zawk. An kohhan upa pakhat chuan, thawhlawmah a hranpaa campaign a awm lo tih sawiin, "Ip lut lo leh pe ṭha thei lo chu an awm ve zauh zauh a, kum tluanin Pathian Ram ip sem dan pangngaiin kan kal. Sawma pakhat pek kan uar a, Pathian zarah thilpekah kan harh a ni," a ti.

Bawngkawn Shalom Presbyterian Kohhran pawhin kum 2019-ah Rs. 1,33,10,526 an hmuh laiin, kum 2020-ah chuan Rs. 1,45,63,656 an hmu a, kum hmasa an khûmna chu Rs. 12,53,130 a ni. An kohhran upa pakhat chuan, "Kohhran indang thar kan ni a, kohhran member kan phûrin kan hria, thawhlawm a pun chhan pawh hi hei vang hi a ni lian ang," a ti a; dan zawhkim pawh an pun chak thu a sawi.