KHAWTHLIR

Nimin khan National Institute of Technology (NIT), Mizoramah Rashtriya Avishkar Abhiyan (RAA) leh Unnat Bharat Abhiyan (UBA) pualin hun hman a ni a; UBA hnuaia NIT-Mizoram adopted village Lengpui khua sikul hrang hranga zirlaite telin, an kal zelna atana ṭangkai tur thilte hrilhfiah an ni. UBA hi thingtlanga chengte'n tunlai thiamna an hman ṭangkai theihna tura inzirtirna atana duan a ni a, RAA chu thingtlanga zirlai pawl 11-12 ten nuam ti taka science leh mathematics an zir theihna tura tihphûrna tur a ni thung.

Sawleng Chhimveng Branch YMA chuan an huam chhunga putar kum 83 mi, mahni chauha khawsa chu nimin khan a in tur an saksak. Hnatlangah hian YMA member mi 80 vel an thawk chhuak a; a sakna atan mi eng emaw zatin hmanrua an thawh khawm bakah, bialtu MLA Lalchhandama Ralte-in in chung tur rangva a pe a ni. 

Lawngtlai district bawrhsap Dr Andrew H Vanlaldika chuan nimin khan Lawngtlai district police-te hnenah kawng sîr, lirthei hûn phal lohna hmuna lirthei dah ke chehna tur wheel lock 12 a hlân.

Khawzawl additional DC Lalrohlua kaihhruaiin nimin khan DC conference hall-ah Khawzawl District Vigilance Committee on Bonded Labour System an ṭhukhawm a, hmalak dan tur an sawiho. Vigilance Committee chuan, line department te, VC leh tlawmngai pawl kaltlanga bonded labour system chungchanga mipui inzirtirna leh district chhunga zirchianna kalpui ni se, an ti.

Lawngtlai bawrhsap Dr Andrew H Vanlaldika chuan nimin khan hriattirna a tichhuak a; Lawngtlai khawpuiah in sakna bungrua, lirthei leh thil dangte kawngpuia mipui chêt velna dâla dah te, tui luankawr (side drain)-ah tui luanna dâla bungraw dah te, kawngpui dunga lirthei sil leh tui chhe luantir/ paihte phal loh a nih thu a tarlang. Thupek hi thla hnih chhung hman tur a ni a, dan zawm lote chu hrem theih an ni.