COVID-19: Mizoram dinhmun Hripui vei hmuh belh a ni lo

February 21, Pathianni khan Mizoramah Covid-19 vei hmuh chhuah a ni lo a, tun February thla chhunga hripui kái hmuh chhuah loh ni lina a ni. Nimin khan Lunglei Pukpui CCC aṭangin hripui laka fihlîm tawh mi pahnih chhuahtir an ni thung.

Pathianni khan ZMC laboratory leh district hrang hrangah TrueNAT-PCR hmangin swab sample endik a awm lo a, RAT hmangin district pangaah sample 327 endik ni mah se, Covid-19 positive hmuh chhuah a ni lo.

Mizoramah Covid-19 vei mi 4,409 hmuh chhuah a ni tawh a, mipa 3,222 leh hmeichhia 1,187 an ni. Nimin tlai dar 5 thleng khan mi 4,379 (99.32%) chhuahtir an ni tawh a, mi 10 (0.23%) thi tawhin, enkawl mek mi 20 (0.45%) an awm.

February 20, 2021 thlenga Mizorama swab sample endik tawh zat chu 2,26,629 a ni a, chu'ng aṭanga Covid-19 positive mi 4,409 chu 1.95% a ni. Hripui vei hmuh tawh zinga mi 2,097 chu Mizo­ram chhunga kái an ni a, mi 2,312 chu Mizoram páwn aṭanga an rawn luh hnua hmuh chhuah an ni thung.

Mizorama district 11 zinga district paruk - Siaha, Kolasib, Serchhip, Mamit, Khawzawl leh Hnahthial district-ahte Covid-19 vei an awm tawh rih lo.