Pawl 9 leh 11 zirlaite sikul an kai ṭan

Covid-19 lêng avanga thla 11 chuang sikul khar a nih hnuah nimin aṭang khan high school leh higher secondary school-a pawl 9 leh pawl 11 zirlaite chuan sikul an kai ṭan. HSLC leh HSSLC exam hmachhawn tur pawl 10 leh 12-te chuan a hmain sikul an lo kai ṭan tawh a ni.

Mizoram sorkar chuan Covid-19 avanga inkaihhruaina a siam ṭhenkhat tidanglamin, February 16 khan thupek a chhuah. Inkaihhruaina tharah chuan, February 22, 2021 aṭangin pawl 9 leh pawl 11 zirlaite chu sikul kal phalsak an ni a, hostel-a awmte pawh an luh phalsak a ni. 

Pawl 10 leh pawl 12 zirlaite chu January 22 khan sikul an lut ṭan tawh thung. 

Zirlai naupangte chu an sikulah taksaah khawsik a awm leh awm loh endikna, infrared thermometer hmangin enfiah an ni a; sorkarin kaihhruaina a siam angin, hostel-a lut turte chuan Covid-19 an vei lo tih finfiahna, darkar 96 aia rei loa mi an neih ngei a ngai a ni.