ZMC-a associate professor lak dan Rajya Sabha MP hoin chinfel a ni

Rajya Sabha MP Ronald Sapa Tlau leh Zoram Medical College (ZMC) director Dr L Fimate leh Health department hotu dangte chuan February 18, 2020 khan Medical Council of India (MCI) pisaah an lêng a, tunlaia ZMC-a zirtirtu chungchanga buaina lian tak awm mek chu MCI secretary general Dr Rakesh Kumar Vats an sawipui. Hei vang hian ZMC-a buaina chu chinfel a ni dawna sawi a ni.

MCI Secretary General hmuhnaah hian Ronald Sapa Tlau leh ZMC Director bakah, Health secretary H Lalengmawia, AMC-a associate professor Dr Lalrinfela leh Dr Hmingthankimi, OSD, New Delhi-te an tel.

Thu dawn danin, ZMC hi tun hnai khan MCI Inspection Team-in an enfiah a; chutah chuan ZMC-a asso­ciate professor 10 - Dr Vanlalhlua, Dr John Lalliandinga, Dr Vanrem­mawii, Dr Lalrinfela, Dr Lalnun­mawii Sailo, Dr PC Lalramenga, Dr Vanlal­hruaii,

Dr Wendy L Ralte, Dr Zorinsangi Varte leh Dr F Elizabeth Lalhmangaihzuali te chu associate professor ni tura la tling pha lo chunga lâk an ni tih hmuh a ni. MCI thu ang chuan, associate professor 10-te chu tling lo chunga lâk an nih avangin bàn tur an ni.

MCI Inspection Team-in ZMC an endik laia associate professor 10-te lak dan an sawiselna chu - 'Associate professor-te chu assistant professor ni hmasa loin associate professor-ah an lut nghal (direct) thiang lo' tih a ni a; hemi chungchangah hian ZMC hotute'n insawihfiahna pe mah se, MCI lam chuan an ngaih pawimawhsak lo niin an sawi.

Hetih lai hian, sorkar laipuiin January 23, 2018-a government gazzette a chhuaha phek 5-na, clause (ii)-ah chuan, 'Assistant professor ni hmasa lo mah se, state hospital-ah kum 10 an thawh tawh chuan asso­ciate professor-ah lak theih an ni ang' tih chiang taka ziah a ni a; chumi ṭan chhan chuan Rajya Sabha MP Ronald Sapa, ZMC Director leh Health Secretary-te chuan MCI Secretary General Dr RK Vats chu an hmu ta a ni.

Dr Rakesh Kumar Vats pawhin AMC-a associate professor 10-te chu bàn an nih loh tur thu leh thlamuang taka an thawh chhunzawm zel theih tur thu ZMC director Dr L Fimate a hrilh nia thu dawn a ni.