MHA-ah ramri document thawn

Ministry of Home Affairs (MHA) kaihhruaina hnuaia state ramri chung­chang buaipui tura committee a din chu an la ṭhukhawm lo. Hetih lai hian, Mizo­ram sorkar chuan MHA-ah ramria an document neihte an thawn tawh.

Kum 2020-a Mizoram leh Assam-in ramria buaina an neih hma khan Assam-in an state aṭanga in dangte nena ramria buaina an neihte chinfel a nih theihna atan MHA chuan hma a la a; MHA chuan state tin aiawh tur an state ṭheuha ramri chungchang buaipui turin nodal officer a ruat bakah, an state bikah nodal officer ruat turin state tinte a hriattir a ni. 

MHA hian sorkar laipui aṭanga Mizoram nodal officer turin MHA Joint Secretary (Security) a ruat a, Mizoram sorkar pawhin Home department additional joint secretary Ramdinliani chu nodal officer atan a ruat ve bawk.

Vanglaini palai zawhna chhángin Ramdinliani chuan, MHA-in committee a din chu an la ṭhutkhawm loh thu a sawi a, "MHA Joint Secretary a rawn kal ṭuma document a mamawh ang a sawite kan thawn a, chumi hnuah pawh mamawh dang a neih a sawite kan thawn leh a ni," a ti. 

Ramdinliani sawi danin, MHA-in ramri chungchang zir chiang turin institution pakhat a ruai a, institution chuan Mizoram sorkar official-te a rawn be pawp tawh a, document an mamawh angte pek a ni. 

Institution lam chuan sorkar thu­neitute nen video conferencing hmanga thil sawiho an duh ang a, hun rem­changah an sawiho dawn a ni.