National Deworming Day hman a ni

Nimin khan Mizoramah National Deworming Day (NDD) hman a ni a, Aizawlah chuan KM Higher Secondary School, Dawrpui Vengtharah hman niin, School Education secretary Esther Lal Ruatkimi chu khuallian a ni.

NDD hi Mizoram district zawng zawngah a ruala hman a ni a, naupang leh tleirawl kum 1-19 inkarte hnenah rúlhût hlo (Albendazole) pek a ni.

Esther Lal Ruatkimi chuan, India sorkarin hriselna kawngah nasa takin hma a la tih sawiin, "Rûlhût avanga natna awm ṭhin - thisen tlâkchhamna leh naupang ṭhanthute ûmbo a nih theih nan nu leh pate'n an fate faina kawngah te, thianghlimna leh hriselna kawngahte zirtirna ṭha an pek a pawimawh," a ti.

Khuallian chuan, NDD chu Mizoramah ṭha taka kalpui a nih ṭhin thu a sawi a; round hnuhnung ber August 2020-a neihah naupang kum 1-19 inkar 99.2%-in Albendazole an ei thu a sawi bawk.

NDD hawnna inkhawm hi NHM mission director Dr Eric Zomawia'n a kaihruai a, Dr Lily Chhakchhuak chuan NDD chungchanga sorkar hmalakna leh hriattur pawimawhte a sawifiah. Inkhawmah hian naupang ṭhenkhat chu Albendazole eitir a ni.

NDD hi February 22-26, 2021 chhungin kalpui a ni dawn a, khaw tina ASHA-te'n in tinah lutin rúlhût hlo la tur chinte chu damdawi an pe kual dawn a, ASHA -te hmuh lai ngeiin ei tur a ni. Kum dangah chuan sikul leh anganwadi centre-ahte hman ṭhin a ni a, kuminah chuan Covid-19 léng avangin tuna sikul kal mek pawl 10 leh 12 zirlaite hnenah rûlhût hlo pek a ni.

NDD a hlawhtlin theih nan Health department chuan School Education, Women & Child Development, Rural Development leh Public Health Engineering department-te a thawhpui a ni.

National Deworming Day hi Lungleiah chuan Lunglei High School-ah chief medical officer Dr Lalrinthangi kaihhruaiin NDD hawnna inkhawm hman a ni a, Lunglei SDO(S) M Misael-a'n a hmanpui. He hunah hian Dr LC Liana'n rúlhût hlo ei pawimawhna leh rúlhût laka fimkhurna turte a sawifiah.

Champhaiah chuan bawrhsap Maria CT Zuali hoin GM High School-ah hman a ni a, Champhai CMO Dr R Lianmawia'n NDD chungchang a sawifiah. An tarlan danin, August 2020 khan NDD kaltlangin Champhai district-a naupang kum 1-19 inkar 45,626-te rúlhût hlo pek a ni a, chu chu target aṭangin 99.75% a ni. Kuminah chuan naupang 47,397 pek tum a ni.

Serchhipah pawh Serchhip H/S tualah bawrhsap Kumar Abhishek hoa hman a ni a; a hawnna hi CMO Dr Laldawngliana Sailo-in kaihruaiin, senior medical officer Dr Lalhlunpuii, DEO Zohmangaihi, Serchhip H/S-a thawkte leh sawm bik mi dangte an tel.

Mamit DC conference hall-ah NDD hi bawrhsap Dr Lalrozama'n a hawng a, CMO Dr Vanlalfela'n NDD chungchang a sawifiah. Inkhawma tel tura sàwm naupang leh tleirawlte hnenah rúlhût damdawi (Albendazole) an sem a, a huhoa eina hun hman a ni.

Hnahthialah pawh bawrhsap Vanlalmawia hoin Hnahthial High School-ah NDD hman a ni a, DEO Micky Lalenkawla'n rúlhût hnathawh hrang hrang leh invèn dante a sawifiah. Zirlaite chu rúlhût laka an fihlim theih nan rúlhût hlo eitir an ni.