Fish-info Mizoram tlangzarh a ni

Fisheries minister K Lalrinliana chuan nimin khan Fisheries conference hall-ah web portal leh mobile application 'Fish-info Mizoram' a tlangzarh.

K Lalrinliana chuan, khawvel changkanna hmanga mipuite'n awlsam zawka Fisheries department an dawr theihna tur Fish-info Mizoram tlangzarh a ni ta tih a sawi a, "Sangha khawina kawngah hmasawnna rahbi a thlen ngei ka beisei. Mobile apps hmang hian department chuan sangha dil endikna (verify) kawngah a ṭangkaipui dawn hle a, sum tam tak sèn ṭhinna lakah a hum thei dawn a ni," a ti.

Fisheries Minister chuan, mipuiin sangha khawi leh dil siam chu a hlâwkna an hre mek tih sawiin, "Sangha khawitu leh dil siamtu an pung zel a, Mizorama kan sangha mamawh intodelh thei turin sorkarin a thei ang angin hma a la mek a ni," a ti a; sangha notê-ah intodelh a pawimawh thu a sawi.

Lalrinliana chuan, Mizoramah sangha notê thar a la tlem tih sawiin, "Fisheries department-in sangha no awpkeuna hatchery lamah ṭan a la a, mimal hatchery siam pawh an awm mek a ni," a ti a; Fisheries department-in Mizorama lui dung sangha - nghaphu sen, léngphár leh a dangte chu dila khawi chi a nih leh nih loh a zir chian mek thu a sawi bawk.

Fish Info Mizoram hi ICT department hnuaia Mizoram State e-Governance Society siam a ni a; sangha khawitu, sangha mana eizawng leh lui dung humhalhtu pawlte Fisheries department-ah an inziak lut thei dawn a, an dilna pawm a nih hnuah identity card an download thei dawn a ni. Mobile apps hi Google Playstore-ah download theih a ni.

Fish Info portal hi Fisheries department website www.fisheries.mizoram.gov.in nen inzawmtir a ni ang a, department aṭangin hriat tur pawimawh leh sangha khawi chungchanga zirtirna awlsam zawka pek chhuah theih tura ruahman a ni bawk.