Vanapa Hall-ah MNF-in thupek bawhchhia - Cong

Mizoram Pradesh Congress Committee (MPCC) chuan thuchhuah siamin, MNF party-in Vanapa Hall-a AMC inthlana an chak an lawm danah sorkarin punkhawmnaa zawm tur thupek a siam an bawhchhia niin an tarlang a; thupek zâwm lote hrem turin Mizoram sorkar an phût.

MPCC chuan February 19, Zirtawpnia MNF party-in AMC inthlana an chak Vanapa Hall-a an lawmnaah Mizoram sorkarin punkhawmnaa zawm tur Standard Operating Procedure (SOP) a siam an bawhchhia tih an sawi a, "Covid-19 avanga kohhran inkhawm pawh dan pangngaia neih a theih loh lai leh biak-inah Pathian chawimawina zai phal a la nih loh laia MNF-te'n an party hla sa a, social distancing ngai pawimawh lo leh mask vuah loin an duh duh danin an khawsa a ni," an ti a, pawi an tih thu an sawi.

MNF party-in thupek an bawhchhia tih finfiahna video a awm thu sawiin MPCC chuan, "Nikum 2020 Krismas ní taka Sakawrdaia EFCI Kohhran, Pathian faka an zai avangin Rs. 5,000 sorkarin a chawitir tawh a, hetih laia sorkar dan siam bawhchhetu MNF laka tun thlenga dan hmanga hremna lekkawh a la ni lo hian dan pawisa lo tura mipui zirtirna lam a hawi thei a ni," an ti.

Congress party chuan, dan zâwm ṭha tura mipui zirtirtu tur zawkte chu dan palzût fo tawh lo turin an ngen nghal bawk.