Champhai Municipal Council din phût

Champhaia tlawmngai pawl hrang hrang - Champhai District NGO Coordination Committee, MZP, MUP, MHIP leh Champhai Ṭhalai Pawlte chuan thuchhuah inṭâwm siamin, Champhai Municipal Council din an phût thu an tarlang.

Champhaia pawl hrang hrangte chuan, Mizoram chu state rethei leh intodelh lo a nih thu tarlangin, "Mi dangte anga hmasawn kan duh ve si a ni. Kan innghahna centrally sponsorship tam zawk kan hmuh theihna dawhthlêng atan district capital tin hi municipal corporation/council/board-a inrêlbàwl ni se. A bikin, Champhai Master Plan leh Champhai Solid Waste Management-te hi kan mamawh ngawih ngawih a ni," an ti.

Municipal corporation/council/board din chu Mizoram sorkar thil tum, thuneihna sem zâi tihhlawhtlinna tur a ni tih chu an hmuh dan a nih thu sawiin Champhai NGO-te chuan, "Hei hi India Danpui hnuaia  inrêlbàwl, federal state pakhat kan nih anga Indian Constitution 74th Amendment Act, 1992-in a phût tihhlawhtlinna pawh a ni," an ti a; central zém an zenna ve theihna tur pawh a nih thu an tarlang.

Champhai NGO-te chuan, Champhai Municipal Council ruahmansak thuai tura sorkar an phût thu sawiin, "Aizawl Municipal Corporation leh Lunglei Municipal Council-te tana rules & act siam zûlzuia Champhai Municipal Council min dinsak thuai turin sorkar kan ngen a ni," an ti.