Dan loa rorelah LADC sorkar puh

Lai District Congress Committee (LDCC) chuan thuchhuah siamin, Lai Autonomous District Council (LADC)-a MNF sorkarin sorkar kalphung, dan leh hrai zah loin rambuai lai ang maiin rorelna an kalpui mek niin an tarlang.

LDCC tarlan danin, Lungpher VC member B Chanchinmawia chu VC atana thlan tlin a nih aṭangin VC ṭhutkhawmah vawi 10 chuang a tel duh loh avangin Lai Autonomous District (Village Council) Act, 2010 bung 5(2)-in a sawi angin VC President-in member a nihna a hlihsak. Chumi chungchang chu LADC hotute chuan June 1, 2020 khan a nemnghet a, B Chanchinmawia seat chu danin a sawi angin seat ruaka puan nghal a ni.

LADC-a MNF sorkarin dan an pawngsual nia sawiin LDCC chuan, "By-election nei mai turah ngaih a nih tawh laiin, LAD lehkha No.V.11012/5/2020-LADC/LAD(III) of 17.02.2021 hmangin VC member aṭanga bàn a nihna chu an revoke a, kan VC dan hman lai Lai Autonomous District (Village Council) Act 2010-ah hian revoke theihna provision siam a ni lo. Hetia an duh dan ang anga VC dan an pawngsual ta mai leh party hamṭhatna tura dan an kuai her hi lungchhiatthlak kan ti," an ti.

Democracy ramah dan a lal ber fo tih hre turin MNF party an duh tih sawiin LDCC chuan, "Rambuai lai ang a ni tawh lo tih hre nawn se. Hetianga dan zah lohna leh pawngsualna hi thleng nawn tawh lo se tih kan phût a ni," an ti a; VC ṭhiah tawh tihnun lehna lehkha chu sût nghal tur leh eng dan hmanga tinung leh nge tih mipui hriata puangzar tura an phût thu an sawi bawk.