Leivûng vangin Tuirial lui a nu rei tawh Chhungkaw 60 vel eizawnna a buai phah
Nikum December thla vel aṭang khan Tuirial lui tui nasa takin a nu ṭan a, tun thlengin fîm lai nei loin a la nu reng. Tui nut chhan chu - a hnar lama leivung paih a tam vang a ni tih hmuh a ni tawh. Tui nú hian Tuirial khuaa chhungkaw 60 vel eizawnna a tibuai a ni.
Vanglaini palai zawhna chhángin Tuirial Village Council President chuan, Tuirial lui chu ruahtui tam lai bâkin a nu ngai lo a, tun anga nut rei a awm ngai loh thu a sawi a, "Balu laa eizawng chhungkaw 30 vel leh mau sâta eizawng chhungkaw 30 velte tan harsatna a thlen nasa hle. Balu pawh a ṭhen chuan an la tho a, mahse, tui a nut êm avangin a hma angin lâk theih a ni tawh lo," a ti.
Tuirial VCP chuan, Tuirial lui tui nut chhan sorkarin rang taka a ngaihvenpui avanga an lawm thu sawiin, "February 22, Inrinni khan Chief Secretary tirhin sorkar official-te leh kan YMA hruaitute'n lui hnár lamah drone nen tui nut chhan an chhui a, Chite luia leivûng paih an awm vang niin a lang," a ti a; leivung paihtute lakah action lak an tum thu sorkar hotute'n an hrilh thu leh, sorkar an nghah mek thu a sawi.
Tuirial khawtlang hruaitute chuan, tui nú avang hian an khawtlangah tui in tur leh chhungkaw mamawha hman tur tui laknaah harsatna an tawh loh thu an sawi a, luia nungchateah nghawng ṭha lo a neih âwm an la hriat loh thu an sawi bawk.
Tuirial VCP chuan, Tuirial luiah kum tin tui tam laiin lui hnár lam aṭangin sangha hrâi ruih ni âwm tak eng emaw zat lui leh a kam velah chhar tur an awm ṭhin thu a sawi a, "Aizawl lam aṭangin luia nungchate huat chi bawlhhlawh paih a tam vang nge, hrai ruih an ni tih kan hre lo a, mahse, lui kamah chhar mai harsa lo takin an vâk chhuak ṭhin," a ti.
Tuirial lui tui hi tunlai hian lei nâwiin a chiah nasa a, a nu em em reng a ni. Tuirial khawtlang hruaitute chuan, tuia lei nawi a tam avangin ṭhalai picnic, blanket sû leh intihlim tura kal ṭhinte tan harsatna a siam nasa hlea an rin thu an sawi bawk.
Hun rei tak chhung Tuirial lui tui nasa taka a nut chungchangah hian chief secretary Lalnunmawia Chuaungo chuan Principal Chief Conservator of Forest (PCCF), Aizawl DC leh Mizoram Pollution Control Board-te chu tui nut chhan leh a ṭul dangte chhui chiang turin a hriattir a; hma la tura a hriattirte pawhin hma an la mek.
Mizoram Pollution Control Board (MPCB) member secretary C Lalduhawma chuan Vanglaini palai zawhna chhangin, February 22 vêk khan MPCB official-te'n Chite lui leh a chhehvel leh Chite luiin Tuirial a finna báwr vel an enfiah tih a sawi.
C Lalduhawma chuan, Tuirial lui tui a nut chhan ber chu leivûng paih vang nia a lan thu sawiin, "Venghlui (Aizawl) biak-in bula in sa lei làite'n a bul luikawrah leivûng an paih char char vang te, Aizawl by-pass road thlang velah leivung paih a tam vangte niin a lang. Aizawl by-pass road thlangah phei hi chuan leivung paihna nghet ang deuh a awm," a ti.
Aizawl DC Vanlalngaihsaka chuan zawhna chhangin, Tuirial lui chu February 22, Inrinni khan DC pisaa officer leh thawktu dangte'n an enfiah thu leh a nut chhan chu a hnár lama leivûng paih vang a nih thu a sawi a; lui dung a thui tham avangin an la enfiah zo lo a, la enfiah nawn leh tum a nih thu a sawi bawk. DC pisa lam mite hian Tuirial lui hi Paikhai lamah an enfiah nia thu dawn a ni.