Vawk lak luh khap a la ni reng - AH & Vety Minister

AH & Vety minister Dr K Beichhua chuan, Bangladesh, Myanmar leh hmarchhak state dang aṭanga vawk Mizorama lak luh khap reng a la nih thu House a hrilh.

MNF member Dr K Pachhunga zawhna kal zelah AH & Vety Minister chuan, Mizoramah PRRS leh African Swine Fever a lên palh chuan mipuiin an tawrh nasat tur thu a sawi a, "Hei vang hian Bangladesh, Myanmar leh hmarchhak state dang aṭanga vawk Mizorama lak luh khap a ni a, khapna hi la kalpui zel a ni," a ti.

Dr K Beichhua chuan, Krismas lai velin vawk mamawhna a nasat avangin hmarchhak ni lo India ram state dang aṭangin phalna nei tan vawk lak luh an phal thu sawiin, "Punjab leh Bangalore vel aṭanga lak luh a ni. Vawkte hi an awmna hmunah an hriselna endik vek a ni a, Vairengteah kan lo endik ve leh bawk," a ti a, phalna nei tan vawk lak luh theih a la nih reng thu a sawi.