KHAWTHLIR

Nimina Assembly session-ah sorkar kum kal meka sum indaih lohna phuhrûkna tur, Supplementary Demand for Grants cheng vbc. 3,398.13 pawm a ni. Chief Minister a awm loh avangin deputy chief minister Tawnluia'n 'The Mizoram Appropriation (Supplementary Demand for Grants 2019-2020) Bill, 2020' chu House-ah pharhin, pass a dil a, ṭum dang ang thoin sawiho loa pass a ni.

Mizoramah Coronavirus (COVID-19) a luh lohna tura hmalakna kal mekah beihpui thlak chhunzawm dan tur rélin nimin khan Tlabung SDO(C) Lalsanglura hoin Sub-Division Level Task Force an ṭhukhawm. Tlabunga medical officer Dr R Lalnienga chuan, nimin thleng khan Kawr­puichhuaha screening point-ah mi 225 endik an nih tawh thu leh Coronavirus vei rinhlelhawm an la awm loh thu a sawi. Ṭhutkhawmah hian screening point dang pahnih - Tlabung khaw chhunga Licheng leh Missionary Kaiah hawn belh an rél.

Finance changtu chief minister Zoramthanga chuan Congress Legislature Party leader Zo

dintluanga zawhna ziaka chhangin, December 2018 aṭanga sorkar kum kal mek chhungin lirthei (four wheeler leh two wheeler) 100 lei a nih thu a tarlang a, "Lirthei lei nan hian cheng vbc. 7.49 sèn a ni tawh," a ti.

Home minister Lalchamliana chuan MNF member Dr Vanlalṭanpuia zawhna chhangin, The Citizenship (Amendment) Act, 1992 tlawhchhanin Mizoramah khua leh tui ziah luh an la awm loh thu Assembly House a hrilh.

MZP Sub-Headquarters, Khuangleng chuan thuchhuah siamin, tunlaiin khawchhak lam aṭangin dan loa kuhva leh man theih thil dang phur ṭhinte'n checkgate hêlna atan Khuangleng khua leh a chhehvel an hmang ṭhin tih an tarlang a, "Hriatthiam har kan ti hle. Heng dan loa sumdawngte hi Mizo leh hnam dang inkawp an ni tlangpui tih hriat a ni a, dan loa sumdawnna reng reng Khuangleng huam chhunga ti tawh lo turin mi tinte kan ngen a, ngenna pawisa lote chu man an nih pawhin, dan anga na taka hrem turin MZP chuan hma a la dawn a ni," an ti.