Zirtirtu transfer & posting atan MLA-te remtihna a ngai dawn

Vanglaini palai zawhna chhangin Lalchhandama Ralte chuan, MLA-te'n an bial chhunga zirtirtu leh zirlaite awm dan an hriat chian thu a sawi a, "Chuvangin, zirtirtu transfer & posting tih dawnin MLA-te remtihna a ngai dawn. Tun dinhmunah chuan chutiang chuan kan kal hrih ang," a ti. 

Congress sorkar liam taah pawh khan zirtirtu transfer & posting dáwnah bialtu MLA-te remtihna lak a ngai tih a ni.

School Education Minister chuan, zirtirtu, khawpuia awmte khawpuia an awm char char ṭhin leh thingtlanga awmte thingtlanga an awm char char ṭhin chu siam 

ṭhat tum a nih thu a sawi a, "Zirtirtu indaih lohna a nasat avangin, sem rual chu tih theih a ni lo. Mahse, zirtirtu awmna hmun ngaia awm bik char char an awm ṭhin erawh siamṭhat tum a ni," a ti.

Zirtirtu indaih lohna a nasat avangin zirtirtu thar lâk a ngai nia sawiin Education Minister chuan, "Tun dinhmunah zirtirtu post ruak 2,300 vel hnawhkhah loh a awm a, tun dinhmunah chuan muster roll-a lâk phawt an ni ang," a ti a; MR hmanga zirtirtu an lak thar turah trained chhuak tawh vek lak tum an nih thu a sawi. 

Lalchhandama Ralte chuan, khaw pakhata sikul pahnih pathum awm, zirlai awm mang lohnate chu chhûn fin zel tum an nih thu sawiin, "Sorkar hmasaa an kalpui ang kha kalpui vel zel kan tum. Bialtu MLA leh khawtlang hruaitute ráwn chungin sikul chhûn fin hi kan kalpui ve zel a ni," a ti. 

School Education Minister chuan, private school-te'n fee an lak dan chu sorkarin a en zui dawn tih sawiin, "Private school neitu intélkhawmte pawhin min rawn hmu tawh a, sorkarin fee an lak theih chin bituk tihsante an rawn rawt a ni," a ti a; private school-te dinhmun chu uluk lehzuala zir chian a nih tur thu a sawi.