Chapchar Kût thupui 'Zo fate inpumkhatna'

Chapchar Kut Organi­zing Committee chu nimin khan chief minister Zoramthanga hoin Chief Minister's Office (CMO) conference hall-ah an ṭhu a; kumina Chapchar Kût thupui atan 'Zofate inpum­khatna' tih an thlang.

Chapchar Kût lawm­naah hian infiamna khaw­vela Mizoram tihmingṭhatute hnenah Chawimawina Nopui hlan ni se, an ti a; kuminah hian footballer Jeje Lalpekhlua leh Mt. Everest láwn chhuak tawh pahnih David Zohmangaiha leh Lalrintluangi te hnenah chawimawina hlan turin an rel.

Chapchar Kut Orga­nizing Committee chuan, Chapchar Kût chu mipuiin hlim leh him taka an hman tlan theih nan venhimna lamah leh dan lekkawhna lamah fimkhur leh zual ni se, an ti a; ruih theih thil leh danin a phal loh thil dang hmang leh kawl an awm chuan dan angin an chungthu ngaihtuah ni se, an ti bawk.