Mamit dist hmasawnna hnathawhte thlirho

Mamit District Development Coordination Committee chu nimin khan chairman CL Ruala, Lok Sabha MP leh co-chairman Ronald Sapa Tlau, Rajya Sabha MP hoin an ṭhu a; sorkar laipui scheme hnuaia hmasawnna hna thawhte an thlirho.

CL Ruala chuan, Committee member-te'n kum 10 chhung lungrual tak leh thawhhona ṭha tak hnuaia hma an lakna chu lawmawm a tih thu a sawi a, "Mizoram hi India rama DISHA hnuaia meeting nei ṭha ber pathum zinga thlan tel a ni a, a lawmawm hle. Sorkar official-te'n mi dangte tana theihtawp an chhuahna chuan mi dangte lâksak theih loh lungawi veng vengna a pe dawn a ni," a ti.

Meeting-a tarlan danin, MGNREGS hnuaiah Mamit district chhungah job card nei mi 20,985 awm mek a, sorkar kum kal laiah ni 80 inhlawhna siam a ni tawh. MGNREGS hnuaia inhlawhna bank account kaltlanga lut chu a dawngtu account-ah a lut ṭha em tih beneficiary-te enpui ni se, an ti.

PMAY hnuaiah hian mi 78-te tan loan pek chhuah tawh a ni a, IWMP/PMKSY hnuaiah 2018-19 chhungin 87% hna thawh zawh a ni tawh. NRDWP hnuaiah Water Supply Schmes New Eden, Dilzawl leh Thaidawrah thawh zawh tawh a ni a; Mualṭhuam K, Phaizau, Teirei Forest/Hruaitluang leh Khantlangahte water supply scheme siam mek a ni bawk.