MNF-in BJP mitmei an vèn avangin CAB an dodâl ngam lo - Vanlalhlana

ZPM Legislature Party (ZLP) deputy leader Vanlalhlana chuan, MNF party chu BJP mitmei an vên avanga The Citizen­ship (Amendment) Bill, 2016 (CAB) dodal ngam loah a puh.

Vanlalhlana hian nimin khan an pawl pisaa inkhawmah thu sawiin, India hmarchhak biala political party leh NGO hrang hrangte'n CAB dodala theihtawp an chhuah vek laiin, MNF chuan rûn dâl chauhin thil an ti ve tih a sawi a, "Hei hian BJP mitmei an véng nasa hle tih a tilang. Hmarchhak state dangah chuan BJP ngei leh an thurualpuite'n CAB pass a nih chuan BJP chhuahsan hialah an vau a, MNF chuan karfung tel loin an do a, pass an duh zawk hial niin a lang," a ti.

CAB chu kum 2016-ah Lok Sabha-a put luh a nih hnuah zir chiang tura din Joint Parliamentary Committee-in dodalna lehkha 9,340 an dawng tih sawiin Vanlalhlana chuan, "Mizoram aṭanga mimala dodalna thu thlentute chu Pu Lalduhoma, Pu Lalhmangaiha Sailo leh Pu Ronald Sapa Tlau te an ni. Pu Zoramthanga erawh Mizo nationalism neitua inchhál siin, India nationalism-ah a intulut tlat thung," a ti a; CAB pass lohna tura NDA leh NEDA zawmna chhu chat tura mipuiin an beisei viau chung pawhin Zoramthanga chuan engmah a ti ngam lo tih a sawi. 

Vanlalhlana chuan CAB pass ni ta se hmarchhak state zinga a tuar nasa ber tur chu Mizo hnam leh sakhua a nih thu sawiin, "BJP-ten central-ah an sorkar leh chuan CAB putluh leh an tum thu an puang lawk a, chuti chunga MNF-in an dodal ngam lo hi hriatthiam a har," a ti bawk.

ZLP Deputy Leader chuan, MLA inthlan neih zawh tâka sorkarna siam khawpa MNF an tlin theih chhan chu Rs. 3,00,000 sem an intiam vang a nih thu sawiin, "Sum sem policy tho hi Congress-in term hnih an lo tlin phah tawh. MNF leh Congress chu policy kalphung inang nei an ni a, ramin a ṭhatpui lohzia kan hre chiang em em a ni," a ti. 

MLPC Act chungchang sawiin Vanlalhlana chuan, "Kan sorkarin zu khap a tum dan leh dry day a puan dan hi a fuh tâwk lo. Zu hi khap an duh tak tak a nih chuan, ordinance hmangin Governor-in order a chhuah ang a, chumi chu thlaruk chhungin Assembly House-in a pass tur a ni. Chumi a nih loh pawhin, Special Assembly session duh duh huna koh theih a ni," a ti a; dan mumal loa zu khap tum chu thil dik a nih loh thu a sawi.