BJP-in CAB tharthawh an tum - MPCC

Congress party chuan nimin khan thuchhuah siamin, BJP leh an thurualpuite chu kum 2019 inthlanpuiah an chak a, India ramah an sorkar leh a nih chuan Citizenship (Amendment) Bill chu tharthawh leh ngei an tum tih an tarlang.

MPCC thuchhuah chuan, February 17, Pathiannia BJP ṭhalai pawl, Bharti Janta Yuva Morcha (BJYM)-in Lakhimpur, Assam-a rally an buatsaihah BJP national president Amit Shah-a'n thu a sawi tih tarlangin, "CAB 2016 pass a nih loh chuan Assam chu dinhmun hlauhawm takah a ding dawn niin a sawi a, a thusawi hi national newspaper hrang hrangah tarlan a ni," an ti.

India hmarchhak state hrang hrangah Citizenship (Amendment) Bill, 2016 duh lohna nasa taka lantir a nih lai meka BJP President-in hmarchhak bial chhungah ngei CAB an tharthawh leh tur thu a sawi chu mak an ti tih thu sawiin MPCC chuan, "BJP-in hmarchhak mite min thamlohzia te, min hriat chian loh ziate leh min ngaih pawimawh lohziate a chiang hleah kan ngai," an ti a; ram dang mi lo lutte'n NE mite an tihbuaizia pawh an hrethiam lo tawpa an ngaih thu an sawi.

MPCC chuan CAB chungchanga Mizorama kohhran ṭawngṭaina te, Joint NGO hmalakna te, NESO leh MZP-te hmalakna tam takte hre duh lo luiah BJP an puh a, "Lok Sabha Election 2019-a thlan tlin an nih chuan CAB an kalpui nawn leh tur thu BJP President ngeiin kan ṭhenawm lawka min la sawi khumsak ngam hi ná kan ti hle. Central-a BJP leh anmahni thláwptute sorkar nawntir hlauhawm­zia a chiang hleah kan ngai," an ti.