Rualbanlote tana sorkar hmalakna zirhona buatsaih

Persons with Disabilities (PwD) commissioner Dr Lalnunthara chuan nimin khan Lawngtlai College-ah rual­banlote tana sorkar hmalakna chung­chang zirhona hun a hmanpui.

Zirhona hi Lawngtlai College principal T Thangṭhuama'n a kaihruai a; Dr Lalnunthara chuan, rualbanlote dikna leh chanvo tarlanna leh humhalhna dan 'The Rights of Persons with Disabilities Act, 2016' leh Mizoram sorkar hnuaia rualbanlote'n a bika enkawl theihna chanvo hrang hrang an neihte a sawifiah.

PwD Commissioner chuan, rual­banlote'n hma an sawn zel theih nan leh an chanvo an hriata an chan theih nan PWD Commissioner office-in theihtawp a chhuah ṭhin tih a sawi a, "Mizoram sorkar chuan tunah hian rualbanlote chanvo leh humhalhna dik taka kalpui a nih theih nan committee din ngaite a din vek tawh a ni," a ti.

Dr Lalnunthara chuan, zirna-in hrang hrangah rualbanlote chu mi pangngai nen enhran tur an nih loh thu sawiin, "Sorkar department hnuaia hna thawk rualbanlote'n harsatna emaw lungawi lohna emaw an neiha an thlenna tur Grievance Redressal Officer ruat an ni," a ti a; agriculture lama hmalakna leh development programme hrang hrangah rualbanlo hmeichhiate chu duhsak bik tur an nih thu a sawi.

PwD Commissioner hian nimin vêk khan Lai Autonomous District Council (LADC) official-te pawh a kâwm a; LADC hnuaia rualbanlote'n an chanvo an chan ngei theihna tura state sorkar nen an kalphung a danglam chuan loh thu te, state sorkar mai bakah central sorkarte nen pawh rualkhai taka an kal mek dante a sawipui a ni.