SHSU-te'n zirlai chawimawi

Sinlung Hills Student Union (SHSU) chuan February 16, 2019 khan Chanmari YMA Hall-ah Sinlung Hills Council (SHC) huam chhunga zirlai ti ṭhate chawimawina hun an buatsaih a, SHC huam chhunga MLA pathum Chalfilh bialtu MLA Lalrinliana Sailo, Tuivawl bialtu MLA Lalchhandama Ralte leh Serlui bialtu MLA Lalrinsanga Ralte-te'n an hmanpui. 

Lalrinliana Sailo chuan SHC huam chhungah MLA pathumten theihtawp an chhuah tur thu sawiin, SHSU-te chu bial hmasawnna tur kawngah MLA pathumte hmalakna theihtawpa ṭawiawm turin a sawm.

Lalchhandama Ralte chuan hmar tlangdung hmasawnnana inkalpawhna kawng ṭha an mamawh thu sawiin, "Hun rei tak hmar tlang dung hmasawnna in kalkan tawh angin lang mahse, Shmasawnna a thlen theihnan zirna kawngah nasa taka hmalak ka tum," a ti.

Lalrinsanga Ralte chuan zirlai kalkhawmte chu hmasawnna atan hnam inpumkhatna ṭha nei tura theihtawp chhuah turin a chah.

Inkhawmah hian pawl 10 distinction-a pass mi 12, pawl 12 distinction-a pass mi pali, under graduate leh post graduate zo thar mi palite chawimawi an hlan a ni.