Assam Forest-in in an sak vangin Ramri-ah buaina tênau a chhuak

Vairengte aṭanga thu dawn danin, July 6 (Inrinni) zing aṭang khan Assam Forest department chuan Vairengte leh Lailapur inkara tun hmaa in an sak tawh chu an sak chhunzawm a, forest guard-te'n silai nen an veng. He thil thleng hriat a nih hnuah hian Mizoram Police-te chuan in sakna hmun an pan a, Vairengte tualchhung mi tlem azawng an kal bawk a; mahse, in sak chu an chhunzawm zel tho. Hun eng emaw chen an inhnial buai a, kut inthlakna erawh a awm lo niin thu dawnna chuan a sawi.

Kolasib DC leh SP-te chu tlai dar 5 velah Vairengteah an thleng a, DC chuan Cachar DC a be nghal. An inbiaknain awmzia a neih loh avangin Kolasib SP chuan Cachar a pan a, buaina chinfel a nih theihna atan hma a la a ni. 

Kolasib SP leh Cachar DFO-te chu ramria Assam Forest department-in in an sakna hmunah an kal a, thil awm dan an sawiho. Meeting-ah hian Cachar DFO chuan, dan leh thupek kenkawhna kawngah harsatna a awm ai chuan in chu sak chhunzawm tawh loh a remti a, in sak hna tihtawp a ni.

Cachar DFO-in in sak chhunzawm tawh loh a remtih lai hian, in chu sak zawh deuh vek a nih tawh bakah khua a thim tawh avangin hna thawh chhunzawm hleih theih a ni lo. In chu nimin khan Assam Forest-te'n an luahin, banner pawh an tar tawh.

In sakna hmunah Mizoram leh Assam police bakah Mizoram leh Lailapur aṭangin mi eng emaw zat an pung khawm a, innawr deuh lek lek awm ṭhin mah se, buaina lian tham a chhuak lo. Zan dar 7:30 velah mipui pungkhawmte chu an ṭin dârh a ni. Buaina a reh hnuah Mizoram police chuan Vairengtea an checkgate aṭanga metre 100 vela hla, pioneer ho camp hluiah IR platoon khat (mi 30) an dah nghal a; Assam lam pawhin Lailapur-a Mizoram lam hnaih ber building aṭanga metre 30 velah police an dah ve bawk. IR-te awmna hmun tur hi Vairengte khawtlang chuan an chei ṭhatsak a, khua a lum avangin fan-te an dahsak.

Assam Forest department-in in an sakna hmun hi February 6, 1994-a Union Home Minister kaihhruaina hnuaia Mizoram Chief Minister leh Assam Chief Minister inbiaknaa an remtih anga state pahnihte'n kutthlak loh (status quo) ve ve tura February 15, 1994-a Chief Secretary ve vete'n an pawm a ni.

Kum 2011-ah pawh khan ramri chungchangah Kolasib DC leh Cachar DC-te an inbe leh a, chutah pawh chuan ramriah state pahnih remtihna lo chuan hmasawnna hna thawh loh ni se, tiin thu an dah leh a ni. Hetih lai hian, Inrinni zan dar 8 vel khan Lailapur aṭanga Mizoram pana tlan lirthei bungraw phur khalhtute chuan, Vairengte auto-rickshaw stand-ah a motor chempuia an sat anga sawiin Lailapur-ah a let leh a; hei vang hian Lailapur-ah lirthei bungraw phur bik Mizoram pan tur chu hun eng emaw chen dan a ni. Police-te'n motor sah nia sawi hi nimin khan an endik a, sahna hnuhma a awm lo.

Vairengte aṭanga thu dawn danin, nimin chawhnu lama Lailapur-a Truck Driver Association pisaa truck driver hruaitute leh Vairengte SDPO  Ramtharnghaka an inbiak hnuah, lirthei bungraw phur dan tihtawp a ni a, ramriah pawh harsatna a awm zui rih lo.