Aizawl district-ah HIV+ve an tam ber

Tourism department-a thawkte tan nimin khan Tourist Lodge, Chaltlangah HIV/AIDS Sensitization Campaign buatsaih a ni. Mizoramah mi 100 zelah mi 2.04-te'n HIV/AIDS hrik an pai ang a nih thu leh, Mizorama district zingah Aizawl district-ah HIV/AIDS a hluar ber thu an tarlang.

HIV/AIDS Sensitization Campaign-a an tarlan danin, kum 2017-a National AIDS Control Organisation (NACO)-in a zir chiannaah India ram pumah mi 100 zela mi 0.22 chu chu HIV/AIDS hrik pai ang an ni a, Mizoramah chuan mi 100 zelah mi 2.04-in HIV/AIDS hrik an pâi ang a ni thung. Mizoram hi India ramah state mihring zat aṭanga chhûtin HIV/AIDS hrik pai tamna ber a ni a, Mizoram bikah chuan Aizawl district chu HIV+ve sanna ber district a ni.

Kum 2015-16 chhungin Aizawl district-ah HIV hrik pai mi 1,025 hmuh chhuah a ni a, kum 2018-19 ah chuan mi 2,003 hmuh chhuah a ni bawk. Ruihhloa inchiu ṭhinte leh hmeichhe inzuar (KS)-te zingah chauh ni lo, mipui náwlpuiah HIV a darh nasa tawh hle tih tarlan a ni.

Kum 2018-19 chhunga HIV kai thar hmuh chhuah mi 2,003 zinga 11.9% chauh high risk group (ruihhloa inchiu leh KS) an ni a, a tam zawk chu high risk group (HIV kai tura ngaihte) pawn lama mi an ni. HIV hrik pai hmuh chhuah thar zingah mahni inringhlela thisen enfiahtir aiin, inrinhlelhna nei lêm lo, chhan dang vanga inentir, doctor-te'n thisen enfiahtir tura an tih vanga thisen endika HIV kai tih hmuh chhuah an tam zawk.

HIV/AIDS Sensitization Campaign hi Aizawl additional DC John LT Sanga'n a kaihruai a; District AIDS Prevention and Control Unit-a district programme manager Dr R Zonunmawii'n Mizoram leh Aizawl district-a HIV/AIDS darh nasat dan leh do dan turte a sawi.

Aizawl District AIDS Prevention and Control Committee-in a rèl tawh angin, Aizawl khawpuia sorkar pisa hrang hrangah a tahtawlin HIV/AIDS Sensitization Campaign neih mek a ni.