Ruihhlo vanga buai, dam duhte enkawlna tur siam mek a ni - Chief Minister

Chief minister Zoram-thanga chuan, ruihhlo vanga buai, dam duhte enkawlna tur siam mek a nih thu a sawi. He thu hi Chief Minister hian Inrinnia Zemabawk YMA Hall-a MHIP Day a hmanpuinaah a sawi a ni.

Zoramthanga chuan, tunlaiin zu leh ruihhloin chhungkaw tam takah harsatna a thlen thu sawiin, ruihhlo vanga buai chhungkuate chu Pathiana beiseina nghat tlat turin a chah a, "Sorkar pawhin ruih theih thil vanga buai, dam duhte enkawlna tur siamin hma a la mek a ni," a ti.

Chhungkua leh khaw-tlang nunah hmeichhia an pawimawh thu sawiin Chief Minister chuan, "Hmeichhiate hi chhungkaw tinuamtu ber an ni," a ti a; hmeichhiate chu an ṭawngka chhuak leh mi dangte nen an indàwr danah thui takin hlimna leh hlim lohna thlen theitu an nihzia hre reng turin a chah.

CM Zoramthanga chuan, MHIP Day hmanga kal khawmte chu hriselna ngai pawimawh turin a chah a, "Sahdah, tuibûr leh a dangte lakah fihlim tum ula, mi dangte pawh zirtir ang che u," a ti.