NEET-ah Mizoramin tan lak a ngai nasa Medical course counselling hun sawi thei rih lo

Tun hnaia National Eligibility cum Entrance Test (NEET) 2019 result chhuakah Mizoram aṭangin qualifying mark hmu pha mi 595 an awm. Mizoram aṭanga ti ṭha ber (pakhatna) Lalruatpuia Sailo s/o Lalrotluanga Sailo chuan full mark 720-ah mark 437 hmuin, 60% a hmu. 

NEET-a tling, Mizoram quota-a zir turte tan counselling tih ṭan a la ni lo a, tih theih hun tur sawi theih a ni lo. Higher and Technical Education hotute sawi danin, Mizorama sang ber hi India ram pumah 94,200-na a ni a, schedule tribe (ST) bikah 1,051-na a ni. Mizoram pahnihna aṭanga a hnuai lam zawng chu India ram pumah 1,23,780-na hnuai lama awm vek an ni tawh a; Mizorama pasarihna leh a hnuai lama awmte chu all India ranking-ah 2,15,801-na hnuai lam vek an ni bawk.

Mizorama ti ṭha zual sawm (top 10) zingah Mizo ni lo mi pahnih an lang a, chu'ngte chu palina Raginee Sandilya (unreserved category) leh, pariatna Jureee Chakma te an ni. Mizoram aṭanga qualifying mark hmu pha mi 595 zingah Chakma 11 leh hnam dang (vai) pariat an awma hriat a ni. 

Mizoram ranking-a Chakma tlingte ranking chu - 8, 17, 18, 43, 47, 106, 153, 237, 297, 353 leh 389-nate an ni a; hnam dangte chu ranking-ah - 4, 61, 66, 124, 133, 348, 371, 405 leh 476-nate an ni. India ram state leh union territory tina pakhatna ṭheuhte zingah Mizoram chu a hniam ber a, a dawttu chu Telangan a ni a, all India-ah 57,022-na a ni.

Mizoram, Manipur leh Assam-te chauh khaikhinin, qualifying mark hmu pha Mizoramah 596 an awm laiin, Manipur-ah mi 3,753 leh Assam-ah mi 12,069 an awm a; mark 400 hmu pha Mizoramah mi pahnih, Manipur-ah mi 468 leh Assam-ah mi 1,122 an awm. All India ranking-a 1,00,000-na chung lama awm Mizoram aṭangin pakhat, Manipur aṭangin mi 345 leh Assam aṭangin mi 783 an awm bawk.

Vanglaini palai zawhna chhangin Higher & Technical Education (HTE) Technical Wing-a hotute chuan, Mizoram aṭanga NEET 2019-a tlingte chuan document pawimawhte Technical Wing-ah an thehlut tawh tih sawi rualin, tun thlengin counselling tih theih a la ni lo a, an tih ṭan hun tur an sawi theih loh thu an sawi.HTE Technical Wing hotute chuan, medical course zir tur thlanna dan, The Mizoram (Selection of Candidates for Higher Technical Courses) Rules, 2016 chungchanga High Court thutlukna chu Mizoram sorkarin Supreme Court-ah a khing mek a, "Supreme Court-in thutlukna a la siam lo a, engtia kalpui zel tur nge kan sawi mai thei lo. Kum dang ngaihtuahin, counselling tih chu a hun tawh," an ti.

Higher & Technical Education (HTE) Technical Wing-a hotute chuan, medical course hrang hrang zirnaah Mizoram zirlaite harsatna ber chu qualifying (entrance exam) a nia an hriat thu an sawi a, "Hei hian kan zirlai - syllabus emaw, kan education system emaw enfiah a ngai hle tih a tilang. Qualifying-ah an hniam viau laiin, medical course an zir tak taknaah erawh chuan hnam dang zingah a hniam vak bik lo," an ti.