KHAWTHLIR

Senate of Serampore-in tun hnaia Pathian thu exam result a tihchhuah-ah Aizawl Theological College (ATC) aṭangin zirlai 57 an pass. ATC aṭang hian Master of Theology (M.Th)-ah zirlai 31 an pass a, A- ah zirlai 10 leh B+ ah 21 an pass a ni. ATC chanchina a vawi khat nan M.Th (Religions)-ah first class-a pass pahnih an awm a; Lalremruatfeli, Republic Vengthlang leh Naga pakhat an ni. Bachelor of Divinity (BD)-ah chuan B+ ah mi 15 leh B ah mi 11 an pass. Missionary Training College-a B.Miss. final year zirlai pass vekin, A- ah pathum, B+ ah pakua leh B ah pathum an pass a ni.

Leitan Pastor Bial KṬP-te chuan Inrinni khan Leitan Kohhran Hall-ah blood donation camp an huaihawt a, Synod Hospital tan thisen unit 52 an pe a, a petute mipa 41 leh hmeichhia 11 an ni. July 5, Zirtawpni khan Serchhip Bazar Branch KṬP-in Serchhip District Hospital tan thisen unit 11 leh Penticostal Bible School-te'n Lunglei Civil Hospital-ah unit 8 an pe bawk.

Economics & Statistics department buatsaih 'Statistical Handbook Lunglei 2018’ chu July 5, 2019 khan Lunglei DRO pisaah tlangzarh a ni. Statistical Handbook tlangzarh taka a lan danin, Lunglei khawpui chhung, town area-ah veng 23 awmin, mi 60,847 an chêng mek.

July 6, Inrinni chhun dar 12 vel khan Teirei lui, Pi Dari luiin a finna lí-ah Duhawma (Phuihraia), Dárlâk chu a tla hlum. Duhawma hi a nupui nena ramkal an ni a, luikam lung nâlah tawlh thluin tuiah a tla ta nia sawi a ni a; a ruang chu Inrinni vêk chawhnu dar 2 velah hmuh a ni. Nimin chhun khan Chhanhima s/o Zanghinglova, Saithah chu Saithah khaw leileta leirawhchan rawhna khurah a tractor khalh lai nen an tla a, a hmunah a thi a ni.