MHIP Day vawi 46-na lawm a ni

July 6, Inrinni kha MHIP Day vawi 46-na a ni a, Mizoram hmun hrang hrangah hlim taka lawm a ni. MHIP Day hi hmun ṭhenkhatah chuan ram hruaitute'n an hmanpui a; intihhlimna hun te, infuih tharna hunte leh mi dangte ṭanpuina hunte an hmang a, branch ṭhenkhat chuan ruai an ṭheh a ni.

Serchhip Sub. Hqrs. MHIP chuan Ramlai community hall, Chhiahtlangah MHIP Day hi an lawm a, an hun hmanpuitu minister Lalruatkima chuan Mizoram rohlu kan tlawmngaipawl lian pathum zinga pakhat MHIP-te chanchin duhawm lo tun hnaiah kan han hre ṭhin chu hrehawm a tih thu sawiin, "Vawiin MHIP Day a lo thlen hian damna lo thleng se la, kan hnam innghahna tlawmngaipawl Lungthu pathum zinga Lung khat, kan Hnam hruihrual thum zinga hrui khat hi a keha, a chah i phal lo ang u," a ti.

Mizoram Youth Commission chairman Dr Vanlalṭanpuia chuan a bial chhunga Mualthuam North Branch-te a hmanpui a, MHIP member pianphunga rualbanlo hnenah wheelchair a pe a, Mualthuam 'N' Branch MHIP hnenah Rs. 10,000 a pe bawk. MLA chuan, MHIP member-te chu an in chhungkhura an mawhphurhna sanzia hre reng tura chahin, "Hmeichhiate hi chhungkua leh khawtlangah in pawimawh em em a, chawimawi leh fak pawh in phu a ni," a ti a; puantah lamah nasa taka ṭan lakpui a tum thu a sawi bawk.

Mamit bialtu MLA H Lalzir­liana pawhin Lengpui Joint MHIP-in MHIP Day an lawmna a hmanpui a; Mizote'n MHIP an nei chu vanneihthlak a tih thu sawiin, "Mizo hmeichhiate hi káwlhráwng tak, ṭawng thiam hauh lo pawha foreign thlenga calculator hmanga sumdawng thei an ni. Nute hi chhungkaw enkawl kawngah in pawimawh em em a, Pathian thurualpuitu ni turin ṭan ila zel ang u," a ti.

Aizawl South-II bialtu MLA Lalchhuan­thanga pawhin a bial chhunga Mission Veng Branch MHIP-in Synod Conference Centre-a MHIP Day an hmanna a hmanpui a, Mizoram sorkara secretary Esther Lalruatkimi chu khualzahawm a ni. Lalchhuanthanga chuan, Mizo ram leh hnam tluchhe mêk tungdinga kai tho tur leh, a hliamte tuam dam turin ramin nute a au tih sawiin, "Kan ramin a mamawh fo tur chu nu ṭha an ni a, pate an pawimawh rualin, nu pawimawhna a sang zual a ni," a ti.