Health Sunday & Hospital Sunday hmang

Mizoram Presbyterian Kohhran chuan nimin khan Health Sunday leh Hospital Sunday an hmang a, Synod aṭanga thupui thlan hmangin thuchah an ngaithla. Synod Hospital-ah damlo khum 355 a awm a, thawktu mi 367 an awm mek thu tarlan a ni.

Nimin chawhnu inkhawmah Health Sunday pualin hun an hmang a, thupui chu 'Natna khirhkhàn tuarte enkawlna' tih a ni a, zan inkhawmah Hospital Sunday puala hun hman niin, thupui chu 'Tidamtu Isua' tih a ni. Zan inkhawma thawhlawm chu Synod Hospital Charity Fund-ah chhûn luh a ni dawn.

Synod Hospital-ah hian thawktu mi 367 zinga 41 chu doctor an ni a, nursing staff & sister 166, Nursing School tutor pakua, para medical staff 27 leh general staff 124 an awm bawk. Mizoram Presbyterian Kohhran chuan kum 1928-ah Hospital Sunday an hmang ṭan a, kum 1981 aṭangin July thla Pathianni hmasa berah hman a ni. Kum 1988 aṭangin Phár Pathianni (Leprosy Sunday) hman ṭhin a ni thung a, kum 2004-ah 'Health Sunday' tia thlâk a ni. Hospital Sunday leh Health Sunday kai kawpin, kum 2006 aṭangin Pathianni vawi khatah a rualin an hmang ṭhin.