Solar plant ṭhat loh chungchang sawiho
Champhai Ṭhalai Pawl (CṬP) chuan tun hnai khan Champhai District Hospital-a solar plant hman theih loha a awm reng chungchang an sawiho a, hman theih a nih theih nan hma la turin sorkar an ngen.
CṬP tarlan danin, Champhai District Hospital-a solar plant bun chu 100 kWp-a chak a ni a, Mizoram sorkar leh Emmvee Photovoltaic Power Plant Pvt. Ltd., Bangalore-te ṭangkawpin Rs. 2,40,00,000 hmanga an bun a ni. CṬP thu dawn dan chuan, a tìr lama an hman bak hman a ni tawh lo a, harsatna an tawh pawhin company lamin an ngaihsak lo a, siam turin an kal ngai lo.
Solar plant enkawl chhunzawm tur hian kum 2014 khan kum nga chhung a buntu company-in an enkawl tur thu an lo tiam tawh tih sawiin CṬP chuan, "Vawiin ni thlengin Mizoram sorkar pawhin he company Emmvee Photovoltaic Power Plant hi a ko kal thei lo," an ti.
CṬP chuan, Mizoramah ministry inthlak lai a nih avangin solar plant siam ṭha leh tura Mizoram sorkar ngen nawn leh an rél a, "August 2019 chhunga engmah chhanna leh hmalakna kan hmuh loh chuan kan remhriat angin hma kan la ve ang," an ti a; sorkar tharah beiseina lian tak an neih thu an sawi.