Chin Hills aṭanga ngaih pawimawh ber Kawng leh lei ṭha a ni - Vanlalzawma
MNF vice president Vanlalzawma chuan nimin khan Mizo Hnam Rúna inkhawmah February 20, 2020-a Chin National Day vawi 72-na an hmanpui chanchin a sawi a; "Chin Hills lam aṭanga kan ngaih pawimawh ber chu inkalpawhna kawng leh lei ṭha a ni," a ti.
Vanlalzawma chuan, Chin National Day - February 20 chu Mizoram State Day nen a inang chiah tih sawiin, "A hun a inang chiah chiah hian ngaihtuahna a tithui hle," a ti a; Chin state chief minister HE Salai Lian Luai leh minister dang pathumte nen an inkawmhonaah Mizoram leh Chin state inlaichìnna leh thil pawi hrang hrang an sawiho a, Chin Hills lam aṭanga an ngaih pawimawh ber chu inkalpawhna kawng leh lei ṭha a nih thu a sawi a ni.
Farkawn leh Sangau lam aṭangin Myanmar-ah awlsam taka kal theih a nih thu sawiin, "Look East Policy hmalakna kal mekah hian nakin lawkah chuan Silchar/ Guwahati lam khu eibar leh bungraw lak luh nan kan la hnuchhawn thei ang. Rethei reng bik tur kan ni lo a, Akyab, Tlabung leh Ṭiau lam aṭangin kan mamawhte awlsam takin kan chaw lut zung zung thei dawn a ni. International boundary-in min dang mah se, kan inunau tlat chuan kan inzawm thei a, min deptute hi kan chipui deuh vek an ni," a ti.
MNF Vice President chuan, February 19-ah Myanmar sorkara an hotunu Aung San Suu Kyi leh hotu dangte nen an inkâwm thu a sawi bawk.