Hmeichhe zirlai ti ṭha chawimawi

Beti Bachao Beti Padhao (BBBP) bul tumin nimin khan Siaha DC conference hall-ah hmeichhe naupang zirlai HSLC leh HSSLC- a distinction leh 1st division-a pass-te chawimawina hun buatsaih a ni a, DC Bhupesh Chauhdary-in a hman pui.

Chawimawi in­khawm hi SDO (S) B Mal­sawm­tluangi'n kai­hruaiin Siaha DC chuan, "Vawiina HSLC leh HSSLC-a hlawhtlinna chang hmei­chhiate ka lawmpui takzet," a ti a, hmeichhiate hian ram leh hnam hmasawnna atan tih theih kan nei a, kan pawimawh a ni tih hre reng tur leh zirnaah pawh taima taka zira hlawhtlinna chang ngei turin hmeichhe naupangte a fuih.

Hmeichhiate hian in­fiamna lamah pawh theihna sang tak an neih thu sawiin Bhupesh Chau­dhary chuan, "Chung in theihnate chu in hai chhuak turin theih tawp chhuah rawh u," a ti. Hmeichhe naupang zirlai tiṭha chawimawina hi mi 36 hnenah pek a ni.