JEE tan counselling buatsaih ṭan NEET tan pawh buatsaih vat tum

HTE hotute hnen aṭanga thudawn danin, The Mizoram (Selection of Candidates for Higher Technical Courses) Rules, 2016 chungchangah Court-ah thubuai a awm avangin technical course hrang hranga Mizoram quota-a zir thei tura tlingte tan hian counselling buatsaih theih a ni lo a, Thawhṭannia Council of Minister ṭhukhawmin rules-ah hian thutlukna a siam tak avangin counselling hi buatsaih theih a ni dawn ta a ni.

Tarlan tawh angin Council of Minister chuan rules-a Category-I a dil theite 'Indigenous People' tiha inziak chu 'Zo Ethnic' bak Mizoramah 'Indigenous People' an awm loh avangin 'Zo Ethnic' pual atan an dah. Cabinet thutlukna avang hian nimin aṭang khan JEE kaltlanga Mizoram quota-a technical course zir thei tura tlingte pualin counselling buatsaih a ni a, zawh a nih hnua State Medical & Technical Entrance Examination (SMATEE) a tlingte pualin counselling hi buatsaih ve leh a ni ang.

State quota-a MBBS leh BDS zir tura paltlang ngai NEET paltlangte puala counselling buatsaih hun tur erawh tihfel a la ni lo a, remchang hmasaa buatsaih turin HTE lam chu an inbuatsaih mek a ni. Hetihlai hian Mizoramin central pool-a MBBS leh BDS seat a neih zat tur leh a neih dawn leh dawn loh hriat theih a la ni lo. HTE hotute chuan central pool chu medical college nei lote tan a nih thu sawiin, "Nikum khan kan vannei a, seat min pe tho a, kumin hian min pe leh dawn em kan hre lo. July thla tawp lam hi min pek hun a ni hrim hrim," an ti.

Hriat theih chinah Mizoramin MBBS seat 84 a nei a, central pool-a seat awm zat tur hriat a la ni lo. MBBS seat 84 zinga 70 chu Zoram Medical College (ZMC)/MIMER-ah a ni a, a bak chu NEC hnuaia seat hmuh ṭhin a ni. BDS-ah pawh central pool hnuaia seat neih zat tur hriat a la ni lo a, NEC-ah seat pasarih hmuh a ni. Hetihlai hian Mizoramin seat a neih chianna NEIGRIHMS, Shillong atana admission tih hun chu July 24 a ni a, RIIMS, Imphal-ah chuan July 25 a ni. Hei vang hian zirlaite'n admission an tih hman ngei theihna tura counselling buatsaih tum a ni a, hemi hnu lama central pool hmuh leh a nih pawhin tih ṭhat dan in dawtin seat chang tawhte pawhin an thlang leh thei dawn tho a ni.

Tarlan tawh angin The Mizoram (Selection of Candi-dates for Higher Technical Courses) Rules, 2016-ah Chakma-te Category-I a dah an nih loh avangin Mizoram Chakma Students' Union (MCSU) chuan Gauhati High Court-ah Mizoram sorkar an khing a, Court chuan tribal ṭheuh ṭheuh chu ang khata inen turin thutlukna a siam a; Court thutlukna ang chuan, Chakma-te chu Category-I ah dah a ngai a ni. High Court thutluknaah hian lungawi loin Mizoram sorkar chuan  Supreme Court-ah a khinglet a, Court chuan thubuai hi a la ngaihtuah lo a ni. Mahse, Cabinet thutlukna avangin counselling hi nimin aṭang khan buatsaih ṭan a ni.