September-ah Bru hruai kîr tum a ni

Tripura refugee camp-a Bru-te chu September 2019 hian Mizoramah hruai kîr tum a ni dawn. Tunlai hian refugee camp-a Bru-te chu Mizoram khua leh tui dik tak an nih leh nih loh enfiah mek a ni.

Home secretary Lalbiakzama hnen aṭanga Vanglaini thu dawn danin, refugee camp-a Bru-te Mizoram khua leh tui dik tak an nih leh nih loh enfiah hna hi July 20 thleng thawh a ni dawn. Enfiah hna thawh zawha official-te report chu thuneitu sang zawkten an enfiah ang a, Mizoram khua leh tui dik takte hruai kîr tur list siam a ni ang.

Bru lâk lêt tur list peih a nih hnuah sum mamawh angte chhût chhuah a ni ang a, hruai kîr hna thawhna atana Ministry of Home Affairs (MHA)-in Mizoram sorkar sum a pek tawh sain a daih dawn loh chuan dil belh leh a ni dawn.Refugee camp-a Bru-te Mizoram khua leh tui dik tak an nih leh nih loh enfiah hna hi kum 2016 khan thawh a ni tawh a, mi 30,000 chuang chu Mizoram khua leh tui dik tak an ni tih finfiah a ni.

Hetih lai hian, Bru hruai kîr hna thawh a nih hnuhnung bera Bru-te awmna tura ruahman khaw ṭhenkhat chuan an khuaa Bru awm tur zatte in hmun leh ram mamawh tur an neih tawh loh thu Mizoram sorkarah an thlen. Hei hi a chhan chu, Bru-te chu an kîr lawk loh avangin an awmna tura an lo tih tawh hmun ṭhenkhatah tunah chuan mi dang an awm tawh vang a ni.

Tarlan tawh angin, June 29, 2019-a New Delhi-a Ministry of Home Affairs kaihhruaina hnuaia Mizoram sorkar, Tripura sorkar leh Bru aiawhte an ṭhu khawm a; MHA chuan October 2019-ah Tripura refugee camp khâr a nih dawn thu leh ṭanpuina pawh tihtawp a nih dawn thu an puang a ni.