Court-in Sihphir kawng siamna tur Work order pe turin BRO a hriattir

Youth Action for Sihphir Town Development (YASTD) in Gauhati High Court (GHC), Aizawl Bench-a PIL an thehluh kal zelah Court chuan Sihphir Veng chhung kawng siam hna thawk tura work order pe turin Border Road Organisation (BRO)-te a hriattir.

YASTD secretary Eddie Lalhma-ngaihzuala hnen aṭanga Vanglaini thudawn danin, Sihphir kawng a chhiat lutuk avanga lungawi loin YASTD chuan ni 3.5.2018 khan GHC, Aizawl Bench-ah hian an president H Zorempuia hmingin PIL an thehlut a, Court chuan thu tlingah a pawm a ni.

Kawng enkawltu BRO chuan ni 8.7.2019 khan Court-ah hian lehkha thehlutin, kawng siamna tura tender chhangtu M/s Nidhi Creative Infrastructure (P) Ltd., Silchar thlang felin, work order an tih chhuah thuai tur thu an tarlang a ni.

High Court chuan BRO chu M/s Nidhi Creative Infrastructure (P) Ltd. hnenah hian ni 19.7.2019 ral hma ngeia work order pe chhuak tur hian a hriattir a ni. Kawng siam tur hi Sihphir Venghlun Presbyterian kohhran biak-in aṭanga hmar lam kms. 27.635 thleng a ni a, a siamna atana ruahman chu cheng vbc. 8.87 a ni.

YASTD tarlan danin, Court-ah hian advocate C Lalfakzuala'n a thlawnin a din sak a, ani hian Durtlang khaw chhung kawng siam chungchangah pawh hnehna a lo chang tawh a ni.