Japanese Encephalitis chungchang sawiho

Health Services-a officer-te chuan nimin khan tunlaia Assam state-a natna chi khat, Japanese Encephalitis (JE) hri lêng mek chungchang an directorate-ah an thlirho a, a ṭul anga hmalak dan tur an rel.

An tarlan danin, JE thehdarhtu chu thosi chi khat, culex an tih a ni a, hetiang thosi hi Mizorama thosi tam ber ang chi a ni. Mihringin JE a kai chuan   khawsik sáng tak an nei thut a, rilru hriatna a tihbuai bakah, tlunte pawh a siam thei. JE hi culex thosite chuan vawk leh ran dang te, tui savate aṭanga kaiin, mihringah an thehdarh ṭhin.

Ṭhenawm state, Assam-ah chuan JE kai mi 200 chuang chhinchhiah a ni tawh a, JE vangin mi 51 an thi tawh. Mizoramah erawh chuan JE natna vei an awm hriat a la ni lo a; mahse, Assam-ah a lên mek avangin Mizoram mipui himna tur leh an kai lohna turin Health department chuan hmalak an rêl a ni.

Health Services hotu-te thurel zingah - JE chungchang zau zawka Health department-a thawkte leh mipui zirtir te, JE vanga damlo nia rinhlelhte thisen endik te, thosi pian theihna titlem tura chak taka hmalak te, mimal invenna atana thil ṭulte neihna tura hmalak te, a ṭulna hmun bika thosi kah a nih theih nan hmalakte a tel.