Cabinet thutluknaah MNF an lawm

MNF party chuan thuchhuah siam­in, 'Mizoramah Zo hnahthlakte bak Indige­nous People an awm lo' tia Council of Ministers-in thutlukna an siam chu Mizote tan thu lawmawm tak a nih thu an tarlang a, "Ram neitu sorkar rorelna hnuaiah hnam himna leh thil hrang hrangah hmasawnna kan hmu mek. Chief minister Zoramthanga kaihruai sorkarin nationalist sorkar a nihzia a tarlang chiang hle," an ti.

Mizoramah Zo hnah­thlak ni lo ram leilung faa inchhiar tum ṭâlh an awm fo tawh nia sawiin MNF chuan, "Thuneihna chelhtu hmasate’n chutiang thu an aupui laia mipui kan manganzia kan la hre ṭheuh awm e. Sorkar thar a piang a, July 8, 2019-a Council of Ministers ṭhukhawm chuan High Court meuhin thu a lo tihtluk tawhnaah huai taka ro an rel hi hnama chiangte rorel dan tur reng a ni," an ti a; hmun hrang hranga Zo hnahthlakte tan Zoramthanga kaihhruai sorkar chu a thlamuanpui tham niin an sawi.

MNF thuchhuah chuan, "Court rorelna a awm leh a nih pawhin, hnam himna ngaihtuahin ram neitu sorkar hian hma a la zel dawn a ni," a ti bawk.