Ram leilung fa duhsak turin ngen

MZP chuan thuchhuah siamin, college hrang hranga zirtirtu indaih lohna phuhrûk tura Rashtriya Uchattar Shiksha Abhiyan (RUSA) hnuaia assistant professor lakna, Mizoram Public Service Commission (MPSC) kaltlanga tih a ni chu lawmawm an tih thu an tarlang a; a theih chin chinah ram leilung fate duhsak ni se an duh thu an sawi.

RUSA hnuaia college assistant professor lak turah, interview tura koh zingah hnam dang an tam hlea an hriat thu sawiin MZP chuan, "Interview tura koh tawh hrim hrim chu hna thawk thei tura thiamna nei an ni tih hi kan ngaihdan a ni a, Mizote'n kan tlin leh theihna chinah chuan ram leilung fa ngei la turin sorkar leh MPSC thuneitute kan ngen a ni," an ti.

RUSA hnuaia college zirtritu tur lakna chungchangah hian MZP hruaitute chuan nimin khan MPSC Chairman chu a pisaah an kâwm a ni. MZP chuan, tunlai hian Mizoram University hnuaiah hna chi hrang hrang lak mek a ni tih sawiin, "MZU hnuaiah hnam dang ṭhahnem tak an thawk tih kan hria a, thiamna sang zawk leh ril zawk nei an nih chuan pawi kan ti lo a, amaherawhchu, thiamna inang leh nihna inangah chuan ram leilung fate duhsak ṭhin turin MZU thuneitute kan ngen a ni," an ti.