MNF sorkar hi Isua'n a thunun lo - ZPM Consultant

ZPM consultant Rev.Dr K Thanzauva chuan nimin khan an party pisaa inkhawmah thu sawiin, ZPM-in sorkarna an chang a nih chuan Mizoram chu zirna khawvelah ram thara hruai luh an tum thu a sawi a; MNF sorkar chu an thil tih leh hnathawhah Isua Krista'n a thunun lo tih a lan thu a sawi bawk.

Tunlaia mite'n an ngaihsan chu a sawia sawi mi ni loin, a tiha ti mi an nih thu sawiin K Thanzauva chuan, "ZPM hian sorkarna kan chang a nih chuan Zoram hi education khawvelah ram thara hruai luh kan tum. Bána kaih (hand holding) policy hmangin mahni kuta din khawchhuahna tur bul ṭanna nei lote sorkarin ṭanpuiin, an dinchhuah ngeina turin kan ṭanpui ang a, an dingchhuak ngei ngei ang," a ti.

Rev.Dr K Thanzauva chuan, MNF chu nationalism bul ṭantu an nih thu a sawi rualin, "Sorkarna an chan hnu hian an thil tih leh hnathawhah Isua Krista'n a control lo, control ni se BJP nen an in mawngzawm lo ang," a ti a; ZPM chuan 'I ram lo thleng rawh se' tih chu an thupui a nih avangin, an sorkar a nih chuan Pathian ṭih chungin Zoram politics-ah hian 'I ram lo thleng rawh se' tih thupui an ken tlat dawn thu a sawi.