A taka ramri humhalh ngam sorkar Mizoramin a mamawh - ZPM Ṭhalai

Zoram Peoples' Movement (ZPM) Ṭhalai chuan thuchhuah siamin, Assam Forest depart­ment-in Vairengte leh Laila­pur inkara sipai cinema hall ṭhina in sak an luah chung­changa Mizoram sorkar hmalak dan chu 'Se bo hnua se kawng khâr' ang nia an hriat thu an tarlang a; a taka ramri humhalh ngam sorkar Mizoramin a mamawh thu an sawi.

ZPM ṭhalai chuan, Mizoram leh Assam-te ram inchuh lai hmun, Mizoram leh Assam sorkar hotute inbiaknaa a tu lam lam pawhin khawih loh tura an tih huam chhunga Assam Forest department-in July 6, 2019-a in an chei ṭha leh an luah nghal chu pawi an tih thu an sawi a, "Kan IR batallion ṭha takte, he cinema hall hlui an sa ṭha lai leh an luah lut lai lo 'Uipui tuilian thlir' ringawt tura Mizoram sorkarin a tír thla hian 'Se bo hnua se kawng khâr' pawh a tluk lo. Kan police-te leh Mizoram mipui min mualphonaah kan ngai," an ti.

MNF-te chu opposition an nih laia MZP-in Bairabi Zophaia Zofate Chawlhbûk an saknaa buaina chhuakah MNF MLA-te leh an party hruaitute rang takin a hmunah an thleng tih sawiin ZPM ṭhalai chuan, "Thuneihna an chan hnu, tuna buainaah hian a hmuna kala enfiah peih awm lo khawpa ramri an vei ta lo a, kan minister-te'n tapchhak záwl aṭangin kan ram a nih thu an puang peih lek tawh a ni," an ti a; MNF hotute chêt dan chu hrilhhaithlak an tih thu an sawi.

ZPM Ṭhalai chuan, ramri chungchanga Mizoram sorkar hmalakna an thlir reng tih sawiin, "Ramri humhalh chungchangah kan sorkarin thapui chhuah a tum a nih ngat chuan theihtawpa puih kan inhuam a, ngawihbopui a tum a nih erawh chuan na takin kan nawr dawn a ni," an ti.